KPK Suku Kamnasa rezolve ona kazu hitu
KOVALIMA, 16 Setembru 2025 (TATOLI) – Prezidente Konsellu Polísiamentu Komunitária (KPK) ho nia membru, iha Suku Kamnasa, postu administrativu Suai, munisípiu Kovalima, konsege revolve ona kazu hitu.
“Molok atu hala’o ami-nia serbisu hanesan KPK ba dahuluk ami realiza enkontru iha suku, hodi fahe tarefa servisu ho nune’e, iha ami mandatu, ami konsege rezolve problema kona-ba rai, violénsia doméstika hamutuk hitu iha Suku Kamnasa, postu Aadministrativu Suai,” Prezidente KPK Suku Kamnasa, Fernando Noronha, relata ba TATOLI iha Suku Kamnasa.
Atuál xefe Suku Kamnasa ne’e dehan, mekanismu rezolve kazu sira hanesan violénsia doméstika no kazu kona-ba disputa rai, ba dahuluk bainhira atu rezolve halo mediasaun hodi rona sira-nia opiniaun hafoin bele foti desizaun.
Kazu violénsia doméstika nafatin akontese, tanba dalaruma família sira iha suku no aldeia la komprende malu, hodi dezentendimentu, ikus mai lori malu mai iha suku halo mediasaun hodi rezolve.
Xefe suku Kamnasa ho nia membru hamutuk 32 simu pose, iha loron 09 fulan-Maiu ho nia kna’ar maka atu koordena ho Polísia Nasionál Timor-Leste (PNTL) hodi redúz númeru krime iha aldeia no suku sira.
Fó hanoin fali katak, bazeia ba dadus ne’ebe Komandante PNTL Munisípiu Kovalima, Superintendente Asistente Polísia Inácio Amaral fó-sai katak, iha Kovalima estabelese ona KPK iha suku 20, falta suku 10 mak seidauk estabelese ho razaun tanba kestaun orsamentu.
Munisípiu Kovalima, iha nia postu administrativu hitu maka hanesan; Fatululik, Fatumea, Fohorem, Tilomar, Maucatar, Suai no Zumalai ho suku 30.
Jornalista: Celestina Teles
Editór: Evaristo Soares Martins
