DILI, 16 Setembru 2025 (TATOLI) – Parlamentu Nasionál (PN) liuhusi reuniaun plenária, hato’o povu pezár no solidarizasaun ba vítima asidente Elevador Glória iha Lizboa, Portugál.
Deputadu sira aprova votu ne’e a favór 55, kontra no abstensaun 0. “Ne’ebé votu ho unanimidade”, Segundu Vise-Prezidente Parlamentu, Alexandrinho Afonso Nunes, fó sai iha sala plenária, ohin.
Sekretária Meza PN, Virgínia Ana Belo, lee sai testu votu númeru 14/2025 pezár no solidarizasaun ba vítima deskarillamentu husi Elevador Glória iha Lizboa katak “ho profundu povu Timor-Leste sente sokante ho asidente ne’ebé akontese iha Elevador Glória iha Lizboa, iha loron 03 fulan-Setembru ne’ebé rezulta ema na’in-16 lakon vida no na’in-200 sofre kanek”, nia lee sai.
Lizboa, sidade ne’ebé furak tebes pinta ho kór-mean konstrante ho azúl iha Mota Tejo, la’ós de’it nu’udar meiu ba transporte, nu’udar ponte entre tempu sira sidade ne’e nia pulsu modernu no ninia moris antigu arte urbana husi nia orijinalidade kulturál kapitál portugeza ne’ebé sai nu’udar sasin ba asidente ne’e.
“Momentu lutu hodi hato’o solidariedade ba vítima mortál no kanek ho mós turista nasionalidade estranjeira. Nune’e, Parlamentu Nasionál espresa ninia pezár ba akontesimentu trájiku no manifesta ninia solidariedade ba vítima ho povu portugés”, nia hato’o.
Tuir inkéritu dahuluk ba asidente ne’e husi Gabinete Prevensaun no Investigasaun Asidente ho Aeronave no Ferroviáriu (GPIAAF), divulga iha sábadu liubá, katak sistema rua redundánsia Elevador Glória operasiona até funsiona, maibé insufisiénsia hodi halo para veíkulu bainhira rotura iha kabu trasaun, no la konsege evita deskarillamentu.
Jornalista: Nelson de Sousa
Editora: Maria Auxiliadora
