DILI, 16 Setembru 2025 (TATOLI)–Prezidente Repúblika, José Ramos-Horta, sei hasoru Papa Leão XIV iha Roma iha fulan-Novembru tinan 2025 no konvida Papa atu vizita Timor-Leste.
Notísia Relevante: Igreja Katólika iha Papa foun: Kardeál Robert Prevost eleitu ho naran Leão XIV
“Ita fulan-Novembru mai ne’e, ha’u sei ba Roma, hasoru malu ho Papa Leão XIV atu halo enkontru ofisiál ida ho nia. Hasoru-malu ne’e atu husu dala ida tan Papa nia disponibilidade vizita tan Timor-Leste, maibé ida ne’e depende ba Papa tanba Papa iha ajenda lubuk ida atu vizita nasaun sira iha liu konflitu hanesan Ukrania, Rusia, Sudaun no sira seluk tan,” Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite, tersa (16 Setembru 2025) ne’e.
Amu-Papa Leão XIV hetan pose formál iha nia misa dahuluk papal iha loron 18 fulan-Maiu tinan 2025, iha Prasa São Pedro, Sidade Vatikanu, hodi marka inísiu ofisiál hosi nia ukun nu’udar Amu-Papa Igreja Katólika Romana nian.
Serimónia tomada pose ne’e inklui aprezentasaun anel no páliu no hetan partisipasaun husi líder mundiál no delegadu ofisiál barak.
Detallu sira kona-ba Inaugurasaun:
Loron: 18 Maiu 2025.
Fatin: Prasa Saun Pedro, Sidade Vatikanu.
Okaziaun: Misa hodi fó pose ba Saun Pedro nia Susesór nu’udar Bispu Roma nian.
Konferénsia Símbolu sira-nian: Amu-Papa Leão XIV simu páliu no Anel Peskadór nian, símbolu sira ninia kargu nian.
Partisipante sira: Eventu ne’e hetan partisipasaun hosi líder mundiál sanulu resin no delegadu ofisiál na’in 150.
Fundu:
Papa Leão XIV hetan eleitu iha loron 8 fulan-Maiu tinan 2025, iha konklave papal ne’ebé akontese hafoin Papa Francisco nia mate iha loron 21 fulan-Abril tinan 2025.
Ninia naran papal, Leão XIV, hili hodi fó onra ba Papa Leão I no Leão XIII.
Nia maka papa dahuluk hosi Estadus Unidus, no figura proeminente ida ne’ebé eleitu hafoin tinan barak servisu nu’udar misionáriu no bispu iha Amérika Latina.
Notísia Relevante: Papa Leão XIV nia liafuan dahuluk ba Roma no Mundu
Jornalista : Hortencio Sanchez
Editór : Cancio Ximenes
