Ramos-Horta partisipa aniversáriu Xina atu hametin lasu amizade
DILI, 16 Setembru 2025 (TATOLI)–Prezidente Repúblika, José Ramos-Horta, partisipa aniversariu Xina ba da-76 hodi hametin lasu amizade no reafirma nasaun rua (2) nia parseria estratéjika.
“Timor-Leste ho Xina relasaun ida-ne’ebé harii bazeia ba lasu istóriku, respeitu mútu, no apoiu sedu no konsistente husi Xina ba soberania Timor nian,” Xefe Estadu hateten iha nia diskursu.
Xefe Estadu dehan, banihira nia vizita Estadu ba Xina ho susesu iha tinan 2024 no tinan 23 relasaun diplomátika formál ne’ebé hametin ona lasu ho objetivu atu kria futuru komún ida no hadi’a povu rai rua (2) nia moris-di’ak.
Prezidente Ramos-Horta reafirma, kompromisu Timor-Leste nian ba prinsípiu Xina Únika no nota apoiu signifikativu Xina nian ba dezenvolvimentu nasionál.
“Agradese ba Xina tanba apoiu ona subsídiu liu millaun 750 yuan, asisténsia vitál durante pandemia COVID-19, no projetu futuru sira inklui ospitál militár foun ida (1) no reabilitasaun área tasi-ibun Dili nian,” Horta tenik.
Atu hametin liután lasu diplomátiku no ekonómiku, Prezidente anunsia desizaun Governu nian atu estabelese Konsuladu Jerál foun ida iha Changsha, Provínsia Hunan, hodi habelar prezensa Timor-Leste nian iha Xina Kontinentál.
Tuir Ramos-Horta, investimentu Xina nian iha Timor-Leste importante tebes, liuliu hafoin adezaun Timor-Leste nian ne’ebé sei akontese ba ASEAN iha fulan-Outubru 2025.
Xefe Estadu hateten, parseria ne’e estende mós ba seguransa, ho interkámbiu militár no polísia ne’ebé intensifika no integrasaun rejionál, ne’ebé Xina sai hanesan apoiante xave ba kandidatura Timor-Leste nian atu adere ba ASEAN no mós ba Organizasaun Mundiál Komérsiu (OMK).
Antes termina diskursu, Prezidente propoin brinde ida ba parseria ida-ne’ebé buras no kontinua inspira pás, progresu no prosperidade ba jerasaun sira tuir mai.
Jornalista : Hortencio Sanchez
Editór : Cancio Ximenes
