KOVALIMA, 17 Setembru 2025 (TATOLI)- Diresaun Floresta iha munisipiu Kovalima kontinua alerta ba komunidade sira atu labele sunu-rai no tesi ai-arbiru, tanba iha tempu bailoron.
“Ba inan-aman sira daudaun ne’e tempu bailoron husu ita kuidadu ita-nia ambiente kuidadu ita-nia ai-laran tuan ita labele sunu rai no tesi ai arbiru tanba ai-horis nia funsaun boot ba ita”, Xefe Departamentu Reflorestasaun Territoriál no Planta Indústriál Kovalima, Domingos Gusmão,hato’o ba TATOLI,iha Kampun-Baru,ohin.
Iha bailoron, nia dehan sidadaun sira sempre sunu-rai no tesi-ai ne’e sai ona tradisaun. “Ita sunu-rai no tesi-ai arbiru ne’e ita estraga ita nia vida moris, nune’e presiza kuidadu ai laran sira tuan. Tanba sunu-rai ida-ne’e fó impaktu la di’ak ba ambiente”, nia fó hanoin.
Iha fatin hanesan, Komunidade Melinda Amaral Soares, afirma nia-parte aseita opiniaun husi xefe floresta alerta, nune’e husu ba sidadaun hotu labele sunu-rai no tesi-ai arbiru.
“Razaun ha’u aseita opiniaun tanba bainhira ita sunu-rai arbiru halo udan been menus no halo bailoron naruk, nune’e bee-maran no mós volume bee menus entaun bele fo impaktu ba ema no animal sira”, nia klarifika.
Atu redús sunu rai no tesi ai-arbiru presiza mós sidadaun ida-idak nia konsénsia rasik atu salva ambiente no tempu udan karik labele hamosu dezastre naturál hanesan erozaun no seluk.
Jornalista: Celestina Teles
Editór:Florencio Miranda Ximenes
