DILI, 18 Setembru 2025 (TATOLI) – Prezidente Repúblika (PR), José Ramos-Horta, apresia manifestante Estudante Universitáriu Timor-Leste (EUTL) tanba garante ambiente moos iha fatin demonstrasaun nian.
“Ida-ne’e úniku iha mundu no fó lisaun boot ida ba ita hotu. Ha’u haree kontente loos, sira hamoos lixu tau iha nia fatin bainhira ramata manifestasaun”, Ramos-Horta hateten iha Arkivu no Muzeu Rezisténsia Timorense (AMRT), ohin.
Nia dehan asaun ne’ebé estudante sira hatudu ne’e matenek no iha responsabilidade ba saida mak sira halo.
“Ha’u haree atividade ne’ebé estudante sira halo furak liufali atividade oioin ne’ebé ita halo iha Dili laran. Bainhira atividade ramata husik lixu naklekar arbiru de’it, ne’ebé laiha ema ida mak preokupa, maibé asaun ne’ebé estudante sira halo ne’e fó lisaun boot ida ba ita hotu atu halo tuir”, dehan.
Lembra katak EUTL halo manifestasaun kontra Parlamentu Nasionál hodi husu kanselamentu ba akizisaun karreta foun ba deputadu 65 no ezije atu halakon Lei Pensaun Vitalísia no seluk tan ne’ebé hala’o iha Parlamentu Nasionál nia oin durante loron 15 to’o 17 Setembru.
Ligadu ba kestaun ne’e, Prezidente Repúblika dehan asuntu ne’e kle’ur ona, maibé agora partidu sira konkorda atu halo revizasaun ba lei ne’e.
Nia dehan tempu ona atu haree fali ba lei ne’e, tanba deputadu sira balu iha Parlamentu Nasionál tinan 20-resin ona, no balu foin tama ida-ne’e mak injustu loos, “tanba kuitadu mestre balu hanorin labarik sira tinan 70 la hetan pensaun vitalísia, maibé elementu deputadu ida foin ba tinan haat lima hetan pensaun vitalísia”.
Nia dehan agora bankada sira konkorda ona atu haree filafali lei pensaun vitalísia, maibé mós tenke haree didi’ak Lei Direitu Adkiridu ne’e hotu.
“Nune’e ha’u husu hothotu konkorda haree filafali, ho lalais labele hateten de’it, maibé tenke iha prazu tempu nune’e halo buat ne’ebé justu no halo diálogu ho joven sira estudante no sosiedade sivíl, bankada sira tenke rona sira-nia ideia no esplika ba sira”, salienta.
Xefe Estadu ne’e hateten nia parte konkorda katak laiha partidu ruma mak hakarak matein maibé hothotu konkorda hanoin ida-ne’e di’ak depoiz mak haree tenke foku duni ba área oportunidade sira seluk.
Notísia relevante: Pedro Belo louva EUTL nia esforsu halo diálogu ho membru Parlamentu
Jornalista: Arminda Fonseca
Editora: Maria Auxiliadora
