DILI, 16 Setembru 2025 (TATOLI) – Sekretáriu-Jerál (SekJer) Parlamentu Nasionál (PN), Edgar Sequeira Martins, liuhusi konferénsia imprensa informa katak prosesu sosa karreta foun 65 ba deputadu sira seidauk finaliza no daudaun iha hela Komisaun Nasionál Aprovizionamentu (CNA, sigla portugés).
Iha konferénsia ne’e, sekretáriu-jerál apresia ba deklarasaun husi bankada tolu – CNRT, PD no KHUNTO ne’ebé hapara akizisaun karreta foun.
“Informa ba públiku katak prosesu akizisaun karreta foun seidauk finál, iha hela aprovizionamentu husi Komisaun Nasionál Aprovizionamentu. Besik konklui, katak iha ona faze ikus ba publikasaun, ne’ebé karreta sira ne’e ita seidauk sosa”, Edgar Sequeira Martins adianta ba jornalista sira iha Parlamentu Nasionál, ohin.
Nia husu ba públiku katak iha informasaun ne’ebé lansa iha mídia sosiál dehan karreta sosa ona ne’e laloos, tanba aprovizionamentu seidauk finál, signifika karreta seidauk sosa, tanba laiha empreza manán-na’in ne’ebé asina kontratu.
“Horisehik bankada sira halo ona deklarasaun katak kansela akizisaun karreta, entaun iha mekanizmu internu Parlamentu Nasionál katak ita Konsellu Administrasaun, órgaun másimu iha Parlamentu Nasionál tenke halo apresiasaun nomós halo desizaun”, dehan.
Tuir nia, atu fó kontinuidade ba deklarasaun husi bankada sira deside kansela sosa karreta maka aban, loron 17, sei lori ajenda ne’e ba iha Konsellu Administrasaun hodi konvoka reuniaun atu diskute situasaun kona-ba sosa karreta.
Tanba iha Konsellu Administrasaun, iha reprezentante bankada sira hotu iha ne’ebá no sei diskute no formaliza deklarasaun ne’ebé bankada sira hato’o ona. “Horisehik ne’e tolu ba iha Konsellu Administrasaun, iha ne’ebá bankada lima, entaun sei formaliza aban. Horisehik ne’e deklarasaun polítika, maibé administrativamente sei formaliza aban”, Edgar dehan.
Nia salienta katak bainhira Konsellu Administrasaun formaliza ona sei lori ba plenária hodi hasai rezolusaun kona-ba kansela sosa viatura.
Kona-ba ba akizisaun, Parlamentu Nasionál mak na’in ba projetu ne’e, nune’e bainhira nia deside kansela mak CNA mós sei halo tuir ida-ne’e. “Maibé prosesu seidauk finaliza, ita seidauk asina kontratu, entaun kualkér momentu bele kansela”, afirma.
Nia salienta katak karreta ne’ebé atu sosa ne’e mak la’ós marka Prado, maibé Fortuner, no agora kansela ona. “Klaru osan ne’e ita la ezekuta, sei filafali ba kofre Estadu”.
Iha sorin seluk, Ministru Planeamentu no Investimentu Estratéjiku, Gastão de Sousa, afirma katak kona-ba sosa karreta foun husi Parlamentu Nasionál daudaun iha CNA, iha faze finalizasaun, katak seidauk iha empreza manán-na’in loloos atu sosa karreta.
“Iha CNA foin iha faze pós-kualifikasaun ka relatóriu finál, katak atu haree iha kompañia ne’ebé konkorre iha kapasidade atu hola ka la’e? Hotu mak foin haruka ba Parlamentu Nasionál deside hola, ne’ebé agora karreta seidauk sosa”, nia dehan.
Tuir ministru, bainhira deputadu sira hasai ona deklarasaun katak kansela sosa karreta maka ministériu hein de’it karta kanselamentu husi Parlamentu Nasionál.”Dala-ida tan hateten ba públiku katak karreta seidauk sosa, tanba seidauk iha kompañia manán-na’in”, konklui.
Notísia relevante: CNRT, PD no KHUNTO husu kanselamentu ba sosa viatura foun
Jornalista: Arminda Fonseca
Editora: Maria Auxiliadora
