DILI, 15 Setembru 2025 (TATOLI) – Bankada parlamentár husi Kongresu Nasionál Rekonstrusaun Timorense (CNRT, sigla portugés), Partidu Demokrátiku (PD) no Kmanek Haburas Unidade Nasionál Timoroan (KHUNTO) deside kanselamentu ba sosa karreta foun unidade 65.
Bankada tolu hato’o pozisaun ne’e liuhusi konferénsia imprensa iha Parlamentu, ohin, relasiona ho manifestasaun husi Estudante Universitáriu Timor-Leste sira-nian ne’ebé ezije deputadu sira iha Parlamentu Nasionál (PN) atu kansela sosa viatura foun.
Vise-bankada CNRT, Patrocínio dos Reis Fernandes, dehan nesesidade ba akizisaun karreta ne’e alokadu ona iha Orsamentu Jerál Estadu (OJE) 2025.
Nia dehan, ida-ne’e bazeia ba Konstituisaun fó knaar importante tolu ba deputadu sira iha Parlamentu Nasionál mak hanesan halo lei, fiskalizasaun ba aktu governativa no foti desizaun politika ba Estadu nian.
No Estatutu Deputadu ne’ebé aprova iha lejislatura dahuluk mak define kona-ba deputadu sira tenke iha fasilidade hodi hala’o sira-nia misaun parlamentár, inklui transporte ne’ebé ho kondisaun adekuada.
Nia dehan bankada tolu kaer ba preokupasaun deputadu 65 nian iha lejislatura daneen kona-ba kondisaun karreta sira ne’ebé atuál deputadu sira uza hodi halao knaar no husi sorin seluk mosu lamentasaun sira husi parte Sekretariadu Parlamentu Nasionál kona-ba difikuldade jestaun karreta operasionál atu hátan ba nesesidade transporte ba deputadu sira, nomós lamentasaun kona-ba kustu ba manutensaun karreta sira ne’ebé daudaun ne’e deputadu sira uza.
Depois leitura didi’ak ba situasaun sira ne’e maka bankada tolu aseita hodi aloka verba ba akizisaun karreta ba Parlamentu Nasionál iha OJE tinan 2025 no bankada tolu konxiente katak desizaun la reprezenta preokupasaun públiku nian.
“Halo análize ba situasaun ne’ebé hatudu, ami-nia hanoin ba Estadu no nasaun mak ami deside hamutuk husu filafali ba Parlamentu Nasionál atu kansela prosesu tomak kona-ba akizisaun [karreta] ba deputadu sira”, nia hato’o.
Lembra katak Parlamentu Nasionál aloka ona montante millaun $4,2 iha Orsamentu Jerál Estadu (OJE) 2025 atu sosa karreta foun unidade 65, hodi fasilita mobilidade no serbisu deputadu sira iha lejislatura daneen.
Sekretáriu-Jerál PN, Edgar Sequeira Martins, konfirma katak prosesu akizisaun viatura foun prosesa hela iha Komisaun Nasionál Aprovizionamentu (CNA, sigla portugés). Nia hateten konkursu públiku atu konklui no iha fulan-Setembru nia laran bele asina kontratu ho empreza manán-na’in hodi hala’o serbisu hatama karreta mai Parlamentu.
“Esforsu iha tinan ne’e, karreta tenke mai, tanba orsamentu alokadu ba tinan 2025. Tuir alvu, antes fim do ano, karreta to’o ona”, nia adianta foin lalais ne’e.
Notisiarelevante: https://tatoli.tl/2025/09/03/karreta-foun-ba-pn-orsamentu-millaun-42-aprova-ona-iha-oje-2025/
Jornalista: Nelson de Sousa
Editora: Maria Auxiliadora
