DILI, 03 Setembru 2025 (TATOLI) – Parlamentu Nasionál (PN) aloka ona montante millaun $4,2 iha Orsamentu Jerál Estadu (OJE) 2025 atu sosa karreta foun unidade 65, hodi fasilita mobilidade no serbisu deputadu sira iha lejislatura daneen.
Sekretáriu-Jerál PN, Edgar Sequeira Martins, konfirma katak prosesu akizisaun viatura foun prosesa hela iha Komisaun Nasionál Aprovizionamentu (CNA, sigla portugés). Nia hateten konkursu públiku atu konklui no iha fulan-Setembru nia laran bele asina kontratu ho empreza manán-na’in hodi hala’o serbisu hatama karreta mai Parlamentu.
“Esforsu iha tinan ne’e, karreta tenke mai, tanba orsamentu alokadu ba tinan 2025. Tuir alvu, antes fim do ano, karreta to’o ona”, nia adianta.
Sekretáriu ne’e mós seidauk ko’alia espesifikasaun karreta no sei mai husi nasaun ne’ebé ho kada presu hira, tanba sei hein CNA konklui prosesu aprovizionamentu mak bele hatene.
“Klaru katak, sei la gasta hotu millaun $4-resin ne’e, tanba kompañia barak mak konkorre. Orsida balun sei aprezenta presu ne’ebé ki’ik liu no júri sira iha CNA sei haree di’ak liu”, nia dehan.
Iha sorin seluk, Prezidente Interinu PN no atuál Segundu Vise, Alexandrino Afonso Nunes, esplika katak karreta sira ne’e sai sai partrimóniu Estadu no sosa atu uza ba Parlamentu nian serbisu, no la’ós atu fó ba uza pesoál deputadu sira.
“Patrimóniu hela nafatin hodi kontinua uza ba serbisu, ne’ebé la’ós ba pesoál, katak hola hotu tenke lori, la’e”, nia esplika.
Hodi klarifika katak orsamentu ba sosa viatura foun ne’e diskute no aprova fiha ona iha tinan 2024, hodi inklui iha OJE tinan ne’e.
Nia salienta katak viatura ne’e sosa ba Parlamentu Nasionál tuir nesidade hodi fasilita deputadu sira utiliza iha lejislatura ne’e hodi hala’o serbisu fiskalizasaun iha baze.
Maski nune’e, nia mós konsidera preokupasaun husi estudante sira tanba iha direitu atu hato’o asuntu ruma bainhira sira haree buat ruma la’o la loos.
“Depois ita haree, sei iha solusaun. Ne’ebé ba ukun-na’in sira mós tenke iha laran-lu’ak, hodi rona aspirasaun sira, depois buka dalan”, nia hato’o.
Prezidente Parlamentu Nasionál, Maria Fernanda Lay, dehan ona antes katak presiza karreta foun tanba kustu manutensaun ba viatura sira ne’ebé daudaun iha ne’e boot tebes.
“Kareta sira ne’e aat hotu ona, tanba ne’e mak Konsellu Administrasaun aprova iha tinan kotuk, orsamentu hodi hola karreta. Tinan ida-ne’e tenke troka duni, se la’e gastu boot tebetebes”, hateten.
Iha 11 Novembru 2024, Parlamentu Nasionál aprova proposta OJE ba tinan fiskál 2025 ba PN ho montante $23,509.772.
Husi montante ne’e aloka ba saláriu no vensimentu $11,934.844, bens no serbisu $6,160.019, transferénsia públika $985.697 no kapitál menór $4,429.212.
Notísiarelevante:https://tatoli.tl/2024/09/19/pn-prevee-millaun-4-resin-atu-sosa-karreta-ba-deputadu-sira/
Jornalista: Nelson de Sousa
Editora: Maria Auxiliadora
