DILI, 19 setembru 2024 (TATOLI)—Parlamentu Nasionál (PN) iha proposta Orsamentu Jerál Estadu (OJE) tinan fiskál 2025 prevee millaun $4-resin atu sosa karreta ba Deputadu sira iha lejislatura da-neen ne’e hodi hala’o serbisu fiskalizasaun iha baze.
Notísia Relevante: PN sosa karreta 30 hodi prepara kondisaun ba deputadu foun
“Bazeia ba programa ne’ebé Parlamentu Nasionál iha hodi haree kondisaun ne’ebé agora iha, entaun iha nesesidade. Iha proposta ida-ne’e orsamentu millaun $4-resin kona-ba karreta,” Sekretáriu Jerál Parlamentu Nasionál, Edgar Sequeira Martins, hateten ba jornalista sira iha resintu PN, kinta ne’e.
Iha nesesidade atu sosa karreta foun, nia dehan, tanba karreta antigu sira balun husi lejislatura anteriór tinan 10-resin ona maibé agora deputadu sira kontinua utiliza no iha Deputadu na’in-lima (5) hanesan ne’e mak uza de’it karreta operasionál hodi hala’o serbisu, ida-ne’e mak situasaun ne’ebé PN hasoru.
Mezmu nune’e, Sekretáriu Jerál ne’e seidauk fó sai detallu husi proposta orsamentu ne’ebé PN prevee atu sosa tan karreta hira iha tinan oin, tanba sei iha diskusaun ikus ba proposta OJE 2025 iha tempu tuir mai nune’e hein akompaña desizaun finál.
Enkuantu, iha loron 18 setembru 2024, PN liuhusi reuniaun plenária estaordináriu aprova projetu rezolusaun númeru 49/VI(1a)-Orsamentu Parlamentu Nasionál ba tinan fiskál 2025 ho montante $23,947,310 aprovadu iha finál globál ho votu afavór 46, kontra 0 no abstensaun 16.
Proposta OJE 2025 nian, PN prevee $23,947,310 maske ntes ne’e hetan tetu husi Ministériu Finansa millaun $20.
Proposta orsamentu privativu PN ba iha tinan fiskál 2025 ho montante $23,947,310 ne’e hodi prioriza programa fomentar relasaun internasionál no kooperasaun, Parlamentu prevee orsamentu $2,110,827 hodi implementa sub-programa rua (2) no atividade lima. (5).
Programa garantir exersísiu funsaun konstituisioná, Parlamentu prevee $15,310, 888 ho nia sub-programa tolu (3) no atividade 29.
Progama promove kultura abertura no transparánsia iha Parlamentu ne’e, PN prevee $175,388 ho nia sub-programa ida (1) no atividade lima (5).
Programa funsionamentu no dezenvolvimentu instituisionál, PN prevee osan hamutuk $6,350,208 ho sub-programa rua (2) no atividade 25.
Entretantu, tuir portál transparánsia ne’ebé Agência TATOLI asesu husi Ministériu Finansa, iha loron 18 setembru 2024 haktuir katak, Parlamentu Nasionál ninia ezekusaun Orsamentu Jerál Estadu (OJE) 2024 ho ninia orijen $17,780,054.00, kompromisu $ $394,893.90, obrigasaun sira $1,783,208.37, atuál $9,672,689.12, saldu $5,929,262.61 no ezekusaun 64.4%.
Jornalista : Nelson de Sousa
Editór : Cancio Ximenes
