PN sosa karreta 30 hodi prepara kondisaun ba deputadu foun
VIQUEQUE, 07 outubru 2022 (TATOLI)–Prezidente Parlamentu Nasionál (PPN), Aniceto Guterres, klarifika, Parlamentu Nasionál (PN) planeia ona atu sosa karreta unidade 30 ho kustu millaun $1 resin hodi prepara kondisaun ba deputadu lejizlatura foun.
“Sosa karreta la’ós ba deputadu sira agora, maibé ba tinan oin lejislatura foun maka uza. Tanba ne’e, ami atu sosa karreta hamutuk unidade 30 hodi prepara kondisaun ba deputadu sira iha lejizlatura tinan oin. Tanba depudatu sira ne’ebé agora lori karreta prado, klaru katak deputadu sira tuir-mai mós iha diretu hodi lori karreta uza ba serbisu atu kumpre sira-nia mandatu,” PPN hateten ba Agência Tatoli, iha salaun administrasaun munisípiu Viqueque, sesta ne’e.
Tuir Aniceto Guterres, karreta sira ne’ebé deputadu lejislatura V sira uza daudaun ne’e kuaze ho kondisaun a’at hotu ona, tanba kerreta sira mai hosi deputadu lejislatura III nian tempu.
“Ha’u nu’udar Prezidente Parlamentu Nasionál ba lejislatura ida-ne’e, ho kondisaun karreta agora ne’ebé aat, klaru tenke troka. Karreta sira ne’ebé ami uza ne’e mai hosi lejislatura III. Tanba ne’e ami tenke sosa, uluk ami sosa uluk ona karreta pajero sport nune’e agora atu sosa tan 30,” nia akresenta.
Notísia relevante: Maria Angelina klarifika uza karreta PN hala’o kontaktu eleitorál la’ós vizita privadu
Aleinde ne’e, PN atu kria kondisaun di’ak ba deputadu sira ne’ebé sei eleitu iha tinan 2023.
“Ha’u haree sosiedade sira krítika labele sosa karreta, maibé sosa karreta la’ós Parlamentu de’it, instituisaun Estadu sira mós sosa hotu karreta, nusa maka ita tenke kestiona. Ha’u-nia dever no obrigasaun tenke kria kondisaun ba deputadu sira ne’ebé sei eleitu iha tinan oin,” Deputadu Bankada FRETILIN ne’e subliña.
Nia dehan, depudatu sira tenke tun ba baze hodi halo kontaktu eleitorál nune’e sira tenke uza karreta ho kondisaun di’ak.
“Ita-nia kondisaun estrada de’it daudaun ne’e barak mak a’at, ho nune’e presiza karreta ne’ebé ho kondisaun di’ak hanesan prado atubele asesu ba dalan sira ne’ebé a’at. Ezemplu hanesan dalan sira iha postu Ossu liga ba Nahareka no Uaibobo sira ne’e kondisaun grave, ida-ne’e presiza karreta ho kondisaun di’ak. Ha’u Hanoin ita tenke realístiku ba moris, labele idealista depois halo propaganda ba interese oin-oin, ha’u kompreende ne’e interese,” nia realsa.
Jornalista : Vitorino Lopes da Costa
Editora : Julia Chatarina
