Maria Angelina klarifika uza karreta PN hala’o kontaktu eleitorál la’ós vizita privadu

DILI, 22 agostu 2022 (TATOLI)—Vise Prezidente Parlamentu Nasionál, Maria Angelina Sarmento, klarifika ba públiku katak foin lala’is utiliza karreta Parlamentu Nasionál (PN) ne’ebé hetan asidente tráfegu ne’e ba hala’o atividade kontaktu eleitorál iha baze la’ós vizita privadu.

Notísia Relevante: Vise Prezidente Parlamentu Nasionál hetan asidente tráfegu iha Manatuto

“Hakarak hato’o agradesimentu ba públiku ne’ebé mak akompaña ona akontesimentu asidente karreta ne’ebé akontese foin lala’is iha Laclubar-Manatuto. Ne’ebé, hakarak klarifika viajen ne’e ba hala’o kontaktu eleitorál la’os vizita privadu,” Vise Prezidente PN ne’e klarifika ba jornalista sira iha Parlamentu Nasionál (PN), segunda ne’e.

Nia dehan, kontaktu eleitorál ne’e bazea ba Rejimentu PN iha artigu 45 kona-ba sesaun lejislativa PN iha períodu resesu, ne’ebé daudaun ne’e deputadu sira hala’o resesu hela durante fulan rua no sei tama fila-fali iha 15 setembru 2022.

Tanba ne’e, aproveita oportunidade resesu nu’udar reprezentante iha devér polítika atu ba hasoru eleitoradu sira iha área ne’ebé izoladu atu fahe informasaun ba sira kona-ba prosesu dezenvolvimentu, orsamentu Estadu nian ne’ebé a-favór ba dezenvolvimentu, no tuir planu nia-parte iha atu hala’o vizita fatin haat iha postu administrativu Laclubar, munisípiu Manatuto.

Atividade primeiru mak hala’o kontaktu eleitorál iha Bora-Laclubar ne’ebé realiza uluk ona enkontru no ba mós Poalaka, aldeia Aimaulin no momentu ne’eba kalan nia-parte atu kontinua viajen mai deskansa iha fatin naran Turilet mak to’o iha área Bualo akontese dezastre tanba kondisaun estrada ladi’ak.

“Vizita ida-ne’e ami planea atu ba fatin tolu hanesan primeiru ba uluk Bora ne’ebé hola parte ba aldeia Lakulau ne’ebé hasoru mós autoridade lokál husu Aimanlin, iha aldeia rua ne’e ko’alia kona-ba problema estrada,” nia dehan.

Nia haktuir, estrada aat liu iha Timor mak parese aldeia rua ne’e iha difikuldade barak mak povu hasoru primeiru liu mak estrada hanesan iha Bora ne’e, entre Soibada ho Laclubar iha Buarahun iha área ne’eba kle’ur ona mak Governu planea atu halo estrada, maibé to’o agora estrada ladi’ak no kuandu asesu estrada ne’eba presiza ho karreta ne’ebé mak iha trasaun no karreta ne’ebé mak kondisaun di’ak.

“Entaun ami to’o iha ne’ebá ami realiza enkontru ho populasaun sira durante oras rua no ami dezloka fali mai iha aldeira Anoli, Poalaka ne’ebé área ne’eba Estadu liuhosi Ministériu Petróleu Minerál (MPM) atu dezenvolve ita-nia mina no gás ne’ebé populasaun mós hola parte ba área ida-ne’e,” nia hateten.

Durante sorumutu, komunidade sira mós hato’o lamentasaun kona-ba dezenvolvimentu mina Poalaka nian entaun hanesan reprezentante povu nia parte iha obrigasaun duni atu ba hasoru povu hodi rona sira-ninia preokupasaun.

“Tanba ne’e labele de’it uza rekursu Estadu ba de’it estrada di’ak sira iha munisípiu maibé mós presiza tenke ba iha aldeia sira-ne’ebé mak povu presiza informasaun, hanesan iha aldeia Lafulau iha suku Manelima, suku Manelima Lama to’o agora sira laiha eletrisidade no povu sei moris iha nakukun laran,” nia dehan.

Nia dehan, iha fali Poalaka populasun sira iha ne’eba falta bee-moos no eletrisdade di’ak ona maibé agora daudaun iha informasaun katak sei iha hela dezentendimentu entre autoridade lokál sira atu loke estrada diretamente ba kedas mina-rai Polaka ninian.

“Ne’ebé, ida-ne’e ami-nia devér atu ba iha ne’eba, atu informa ba povu nia hakarak, nesesidade, ezijénsia, liuhusi ami tanba la’ós ami reprezentante povu nia tilun, matan no ibun sira laiha iha kanál atu hato’o,” nia hateten.

Vizita ida-ne’e realiza ho kuiñesimentu autoridade lokál hosi postu Administrativu Laclubar, nune’e hakarak klarifika vizita ne’e la’ós lori família ba asuntu privadu hafoin to’o hetan asidente ne’ebé la espera.

“Ha’u hakarak klarifika la’ós lori família ba pasear fali iha estrada aat. Se ha’u lori ha’u-nia família ba pasear karik, ami ba fatin ne’ebé luxu la’ós ba fali estrada aat. Entaun, ami-nia reuniaun ida-ne’e realiza no hetan kuiñesimentu hosi autoridade lokál no hasoru malu mós ho komunidade balun,” nia klarifika.

Maria Angelina mós klarifika kona-ba ninia kaben mak hanesan kondúz karreta ho marka PN iha momentu ne’eba inklui tula mós ninia oan.

“Ha’u-nia kaben mak lori karreta ho razaun katak dezde iha fim jullu ne’e ha’u-nia motorista vakun tiha prosesu administrativu foti fali motorista foun ne’ebé prosesu la’o, prosesu tékniku entaun haree ba tempu ajenda ne’ebé planeadu ona, nune’e ha’u-nia kaben hanesan motorista provizóriu. Kona-ba motorista ne’e kestaun ita ko’alia kona-ba pesoa de konfiansa, iha Parlamentu Nasionál ha’u haree katak laiha Deputadu ida mak nia motorista ne’e nia utiliza ba konkusu públiku, ema mai aplika maibé laiha. Iha ne’e, maiória deputadu sira tenke identifika ou nomeia nia motorista ba ema-ne’ebé nia konfia,” nia esplika.

“Ha’u-nia oan sira iha laran hotu tanba ha’u hanesan inan ne’ebé asume kargu públiku maibé  ha’u mós asume kargu doméstika hanesan inan, la’o loron tolu ha’u-nia oan sira idade menór 15 imposivel husik sira hela mesak,” nia dehan.

Iha fatin hanesan xefe suku Orlala, postu administrativu Laclubar, Carlos Alves, hateten nia-parte iha duni kuñesimentu ba vizita Vise Prezidente Parlamentu Nasionál nian to’o iha sira-nia leet no nia konsidera dalan ne’ebé Vise PN hetan asidente ba antes ne’e mós movimentu transporte balun mós hetan asidente iha fatin refere tanba kondisaun estrada grave.

Nune’e autoridade lokál ne’e husu Governu liuhosi ministéiru relevante atu tau atensaun ba problema estrada inklui problema báziku sira seluk.

Notísia Relevante: Hetan asidente tráfegu, Vise Prezidente PN baixa iha HNGV

Jornalista : Nelson de Sousa

Editór       : Cancio Ximenes