DILI, 17 Setembru 2025 (TATOLI) – Arsebispu Metropolitana no Bispu Dioseze Dili, Don Virgílio Kardeál do Carmo da Silva SDB, husu Parlamentu Nasionál hamutuk ho Estudante Universitáriu Timor-Leste atu promove dalan diálogu hodi evita mosu dezentendimentu iha publiku tanba úniku dalan ne’e bele hetan solusaun ida entre ema hotu nia hakarak.
Don Virgílio Kardeál da Silva, esplika, istória luta Timor-Leste ba libertasaun pátria liuhosi faze oinoin, liuliu laiha justisa no ema barak sofre hodi lori situasaun la hakmatek maibé kultura diálogu nafatin eziste iha sosiedade ho hametin pás entre komunidade. 
“Dalan ida-ne’ebé di’ak hodi hatán ba preokupasaun husi EUTL mak tuur hamutuk promove diálogu liuliu esplika didi’ak ba kauza ne’ebé akontese,” Virgílio Kardeál do Carmo da Silva, SDB hateten iha ninia kna’ar-fatin Bidau, kuarta ne’e
Nia konsidera, siituasaun hanesan akontese iha tempu Timor-Leste ukun aan nune’e obrigadu foinsa’e sira halo agora asaun hanesan reasaun ida-ne’ebé EUTL haree katak desizaun balun ne’ebé deside husi PN fó sastifas bazeia ba realidade moris povu nian.
Líder Igreja Katólika ne’e, argumenta, manifestante sira lori aspirasaun husi povu hodi hato’o ba reprezentante povu iha PN nune’e presiza rona malu hodi tetu tanba ne’e mak momentu oportunu hodi tún dereta rona foinsa’e sira-nia lian nune’e bele hetan solusaun.
“Ida-ne’e mak kauza lori sira ko’alia sai buat-ne’ebé sira sente liuliu desizaun Parlamentu Nasionál atu sosa karreta tuir issue ne’ebé mosu,” Don Virgílio Kardeál argumenta.
Don Virgílio komenta, Timor-Leste sei iha situasaun probreza, enkuantu ekonomia entre povu no ukun-nain sira iha diferensa, maske tuir regra presiza iha subsídiu ba membru PN maibé presiza tetu ho kondisaun moris povu nia iha baze tanba-ne’e ho asaun husi EUTL sai momentu reflesaun ba ukun-nain sira hodi foti desizaun.
Don Virgílio hato’o mesazem katak Timor-Leste nasaun demokrasia iha liberdade atu halo manifestasaun maibé husu ba EUTL bainhira hato’o aspirasaun presiza liuhusi maneira pasivu no diálogu mak úniku dalan hodi hetan solusaun.
EUTL halo manifestasaun hodi kontesta ba Parlamentu Nasionál atu kansela kompra veíkulu karreta, maibé liuhosi liuhosi plenaria fo-sai desizaun ho unanimidade kansela kompra karreta iha loron tersa, 16 Setembru tinan 2025.
Alende ne’e, kontestasaun seluk husi EUTL husu Parlamentu Nasionál halakon lei pensaun vitalísia no revoga lei manifestasaun ne’ebé iha ona akordu hodi kontinua prosesa iha Parlamentu Nasionál.
Jornalista : Natalino Belo
Editór : Evaristo Soares Martins
