DILI, 16 Setembru 2025 (TATOLI)-Parlamentu Nasionál, liuhusi reuniaun plenária, aprova ho unanimidade rezolusaun kanselamentu ba prosesu sosa karreta foun unidade 65 ho votu a favór 57, kontra no abstensaun 0.
“Pasa ho unanimidade”, Segundu Vise-Prezidente Parlamentu, Alexandrinho Afonso Nunes, fó sai iha sala plenária, ohin.
Sekretária Meza PN, Virgínia Anabela, halo leitura ba rezolusaun PN númeru 65/2025, reorganizasaun jestaun no utilizasaun efisiente frota transporte PN.
Tuir termu artigu 92 iha Konstituisaun, PN nia knaar mak atu halo lei, fiskalizasaun polítika no foti deliberasaun iha matéria relevante interese ba Estadu no komunidade nasionál.
Tuir mós artigu 12, númeru 1, alínea a), Lei númeru 5/2004, 05 Maiu, Estatutu Deputadu, ho alterasaun subsekuente, deputadu iha direitu transporte hodi dezempeña funsaun parlamentár no kontaktu eleitorál, konkretizasaun ne’e depende definisaun husi Parlamentu Nasionál, liuhusi rezolusaun.
“Kuadru normativu ne’e reafirma organizasaun meiu transporte ba serbisu PN ho efisiénsia no transparénsia jestaun di’ak”, salienta.
Nia realsa mós organizasaun meiu transporte ba serbisu PN hodi observa prinsípiu prosekusaun interese públiku, legalidade, proporsionalidade ba efisiénsia no jestaun finanseira di’ak. Asegura mós kondisaun adekuada ba ezersísiu parlamentár no rasionalizasaun rekursu públiku.
Prezente rezolusaun tradús vontade PN iha reorganizasaun rejime transporte ba deputadu, garante kontinuidade funsaun parlamentár no utilizasaun efisiente karreta ezistente, hanesan posibilidade rekorre solusaun alternativa, ho ekonómiku no proporsionál ho plena observánsia interese públiku.
PN rezolve tuir termu artigu 92 husi Konstituisaun hanesan: “Dahuluk, kansella prosesu akizisaun viatura foun inskritu iha Orsamentu Jerál Estadu (OJE) 2025”.
“Daruak, determina Sekretáriu-Jerál Parlamentu adota medida administrativa no finanseira destina manutensaun no utilizasaun efisiente frota ezistente, garante kontinuidade atividade parlamentár”, dehan.
Proposta rezolusaun ne’e aprezenta husi bankada parlamentár CNRT, PD no KHUNTO.
Deputadu CNRT, Natalino dos Santos, hateten rezolusaun ne’e aprezenta tanba bankada tolu hato’o ona pozisaun ba kanselamentu akizisaun viatura relasiona ho ezijénsia husi Estudante Universitáriu Timor-Leste nian.
Deputadu FRETILIN, Antonino Bianco, no deputada PLP, Maria Angelina Sarmento Lopes, dehan dezde inísiu debate OJE 2025 bankada rua aprezenta ona proposta hodi husu hasai verba ne’e, maibé la hetan fatin tanba ne’e agradese ba estudante sira fó ona hanoin, nune’e Parlamentu ohin bele iha konsensu hamutuk deside kestaun referida.
Notísia relevant: https://tatoli.tl/2025/09/15/cnrt-pd-no-khunto-husu-kanselamentu-ba-sosa-viatura-foun/
Jornalista: Nelson de Sousa
Editora: Maria Auxiliadora
