HNVG rekoñese ai-moruk ba trauma nian “stock out”
DILI, 17 Setembru 2025 (TATOLI)—Diretór Servisu Apoiu Diagnóstiku no Terapeutiku Vidal de Jesus Lopes, rekoñese ai-moruk ba trauma nian daudaun ne’e stock out maibé iha ai-moruk ne’ebé hanesan atu bele subtitui.
“Ami rekoñese duni katak ai-moruk ida Naps ho Diazepam neste momentu stock out, maibé nia alternativu seluk mak hanesan Mizolam ami komesa hetan uitoan ona husi parte INFPM, fornese mai ami ho kuantidade natoon hodi asegura no sai alternativa hodi fó ba pasiente sira,” Vidal de Jesus Lopes hateten ba jornalista sira iha nia kna’ar fatin HNGV, Bidau, ohin.
Nia dehan, ai-moruk sira ne’e katégoria iha Naps, ka narkotik saykortik ne’ebé nia prosesu sira ne’e iha institutu Nasionál Farmásia Produtu no Médiku tanba ai-moruk ne’e kompleksu oituan.
“Ai-moruk kona-ba Naps ne’e, kategoria hanesan narkotika, psikotropika, ne’e prosesu ne’e INFPM mak prosesu tanba nia prosesu ne’e kompleksu uitoan. Depois ami mós buka tuir hatene, tanba saida mak sasán sira-ne’e mai demora, tanba Naps ne’e kategoria Midazolam, Morphine, Ketamine, Diazepam, entaun sira-ne’e kategoria narkotika entaun iha lei katak so INFPM bele hatama no prosesu tomak tenke iha ne’eba,” nia esplika.
Iha sorin seluk, familia pasiente Francelino Tavares informa loron 20 fulan Agustu tinan ne’e akompaña nia oan mane Francelino Tavares ho idade 17 ba Hospoitál Nasionál Guido Valadares, hafoin tama iha sala emerjénsia no médiku sira halo tiha diagnosa depois hateten katak moras ne’e grave, entaun hanesan familia sente triste.
“Aimoruk ne’e ospitál laiha, tanba ne’e husu jestór sira tenke jere ai-moruk ne’e ho didiak, nune’e pasiente sira bele hetan atendementu di’ak, nune’e bele rekupera husi sira-nia saúde,” Familia pasiente Antonio Tavares afirma.
Jornalista : Felicidade Ximenes
Editór : Cancio Ximenes
