DILI, 17 Setembru 2025 (TATOLI)—Polísia Nasionál Timor-Leste (PNTL) liuhusi Servisu Investigasaun Kriminál Nasionál halo ona identifikasaun ema ne’ebé aproveita tama iha manifestasaun inklui sunu karreta Estadu ida ho marka Toyota Fortuner, besik sumáforu Kuartel Jenerál PNTL nian.
Karreta ne’e hetan sunu durante manifestasaun loron daruak nian.
“Horseik ita kaptura manifestante no ema balun ne’ebé infiltra tama iha laran hamutuk na’in-12. Depois ita mós kaptura maluk ida-ne’ebé sunu karreta Fortuner iha parte sorin ne’ebá. Ita lori mai halo identifikasaun hodi haruka nia fila,” Diretór Servisu Investigasaun Kriminál Nasionál, Superintendente Polísia João Belo dos Reis informa ba jornalista sira iha nia knaar fatin, Komandu Jerál PNTL, Kaikoli, Kuarta ne’e.
Durante identifikasaun, ema hirak ne’e koopera tebes no parte Polísia haruka fila tanba la’ós fraglante delitu no prosesu ne’e sei la’o.
Maski nune’e, Superintendente Polísia lakohi fó sai ema sira ne’e nia identidade tanba kestaun segredu justisa.
Notísia relevante : EUTL husu Parlamentu halakon kultura sosa karreta luxu
Nia relata, durante Estudante Universitáriu Timor-Leste (EUTL) halo manifestasaun hahú loron 15 to’o 16 Setembru, rejista ona kazu krime tolu.
“Hahú husi loron dahuluk Estudante Universitáriu Timor-Leste halo saida to’o mai iha loron daruak ne’e teknolojia CCTV no drone grava buat hotu ne’ebé estudante sira halo. Ita rejistu kazu karreta ida horisehik hetan sunu, Postu Polísia ne’ebé ita-nia membru sira serbisu hetan estragu, depois membru ida mós hetan kanek no estudante mós hetan kanek,” nia haktuir.,
Husi sidadaun na’in-12 inklui mós ema estranjeiru ida ne’ebé ho motór tuir hela manifestante sira nia kotuk deskonfia fahe osan ba manifestante sira.
“Prosesu sei la’o, ha’u lakohi ko’alia kona-ba kestaun polítiku nian, prosesu identifikasaun sei la’o ba aktu sira ne’ebé Polísia halo maibé na’in ba motór ita bolu mai ona no ita halo ona identifikasaun ba nia,” Superintendente Polísia tenik.
Parte seguransa asegura ona motór ne’ebé sidadaun estranjeiru uza hodi tutuir manifestante sira.
“Ita mós asegura ona suspeitu na’in-rua ne’ebé mak simu osan ema ne’e no agora ita mós halo ona identifikasaun ba ema na’in-rua ne’e,” nia haktuir.
Komandante Investigasaun Kriminál afirma katak manifestasaun ne’ebé mak organiza husi EUTL ne’e manifestasaun ne’ebé real no laiha partidu polítiku balun mak iha manifestante sira nian kotuk hodi apoiu sira.
“Manifestasaun ida-ne’e reál, manifestasaun ne’e organiza husi estudante universitáriu. Polísia sei halo identifikasaun no karik iha aktu violénsia ruma maka sei halo identifikasaun,” nia hato’o.
Nune’e mós, Polísia mós halo ona identifikasaun ba pesoál serbisu sekretu ne’ebé aproveita situsaun horisehik hodi tuda fali autoridade seguransa iha resintu UNTL oin.
Jornalista : Natalino Costa
Editora : Julia Chatarina
