Prezidente AMTL husu membru sira servisu hamutuk atu promove saúde públiku
DILI, 17 Setembru 2025 (TATOLI)—Prezidente Asosiasaun Médiku Timor-Leste (AMTL), Herculano Seixas, husu ba membru AMTL atu kontinua servisu hamutuk, solidáriu no servisu profisionál hodi bele hatutan misaun ne’ebé mak iha liuliu atu garante unidade solidariedade, profisionalizmu no promove saúde públika no moris di’ak ba povu Timor-Leste.
“Ha’u husu ba médiku sira atu kontinua servisu hamutuk, solidáriu no sevisu profisionál liután hodi bele hatutan misaun ne’ebé mak AMTL define ona. Liuliu atu garante unidade solidariedade profisionalizmu ba moris di’ak membru sira-nian, no atu defende no promove saúde públika no moris di’ak ba povu Timor-Leste,” Herculano Seixas hateten ba jornalista sira bainhira ramata serimónia primeiru konsellu interkalár nasionál iha sede AMTL Bidau Tokobaru, ohin.
Nia dehan, prezidente eleitu AMTL ba 2025-2028 mak hamutuk ho Sekretáriu Jerál konvoka reuniaun ba konsellu interkalár ne’ebé tuir estatutu define katak, depois prezidente ho sekretáriu jerál simu pose tenke konvoka primeira reuniaun konsellu interkalár dentru loron 30.
“Asembleia jerál ba da-hitu (7) foin lalais mak realiza iha semana kotuk no ohin ita realiza reuniaun dahuluk konsellu interkalár iha sesaun tolu mak realiza ba konsellu ida-ne’e mak dahuluk deliberativu mak konsellu interkalár, ofisializa relatóriu husi diresaun ezekutivu sesante no entrega ba estrutura foun. Sesaun daruak mak halo apresiasaun no aprovasaun ba membru konsellu ezekutivu ne’ebe mak sei halo kompletu estrutura AMTL ba periodu 2025-2028. Datoluk, apresiasaun no aprovasaun ba programa diresaun ezektuiva nian ba tinan 2025-2028. Ida-ne’e mak desizaun delibertaivu depois tuir mak sesaun pose ba vise prezidente AMTL, sekretáriu jerál, xefe departamentu no membru sira,” nia afirma.
Nia relata, AMTL nia prioridade ba tinan tolu oin mai mak foka ba área estartéjiku neen (6). Dahuluk, atu hametin jestaun organizasaun tanba AMTL iha sub programa lubuk ida atu haree ba ida-ne’e liuliu sei hadi’a kuadru legál sira-ne’ebé mak AMTL presiza tebes atu dezenvolve, hanesan rejimentu internu hanesan padraun operasionál ba jestaun finanseira, nune’e mós atu define planu estratéjiku asosiasaun nian ba tinan lima (5).
“Iha tan programa balun ne’ebé mak ita atu halo hanesan reforsa liután jestaun asosisaun nian mak lansamentu internet gratuita ba membru sira-ne’ebé mak ohin realiza ona no kontinua hadi’a baze dadus prodús atributu no mós jestaun di’ak ba edifisiu ne’e,” nia esplika.
Daruak, atu halo advokasia ho hanoin katak atividade sira-ne’ebé mak dirijente sesante halo ona liuliu kriasaun orden médiku Timor-Leste, kodigu etika profisionál nomós padraun kompeténsia sira-nia mandatu atu kontinua advokasia ba Ministériu Saúde, Parlamentu Nasional atu aselera estabelesimentu orden médiku Timor-Leste no kontinua halo advokasia ba baze legál politika, guia pratika klinika ne’ebé sei fó benefisiu ba saúde públika iha Timor-Leste.
Datoluk, atu hametin parseria liuliu sei kontinua atu estalebese kooperasaun di’ak ho Governu liuliu Ministériu Saúde no halo koperasaun di’ak ho ajénsia internasionál sira ho asosisaun médiku iha nivel ASEAN no nivel CPLP.
Dahaat, foka ba formasaun ba membru sira iha área klinika, peskiza no saúde públika nune’e kontinua mós fó formasaun ba membru sira-ne’ebé mak foin gradua sira seidauk iha esperiénsia, maibé médiku seniór sira sei kontinua dezeña programa formasaun ne’ebé mak di’ak ba sira atu eleva sira-nia kapasidade.
“Ita mós promove atividade peskiza siéntifika no semináriu siéntifiku iha nivel nasionál no munisipál no kontinua promove atividade kulturál ne’ebé motiva hodi garante bein-estar ba membru sira,” nia hateten.
Dalima, promove saúde komunitária no asisténsia sosiál ho hanoin katak AMTL mós iha responsabilidade sosiál, oinsá atu presta servisu asisténsia ba komunidade.
Durante ne’e iha programa balun ne’ebé mak dirijente sesante sira halo ona hanesan programa promosaun saúde ne’ebé kolabora hamutuk ho mídia sira hotu, oinsá bele fó promosaun edukasaun saúde ba populasaun liuhusi mídia sosiál.
“Ami sei lansa Youtube AMTL nian, nune’e bele kontinua habelar informasaun ba komunidade. Ami mós hanoin atu organiza programa asisténsia médika ba iha komunidade no fó liu prioridade ba komunidade ne’ebé mak hela iha área remota defisil atu asesu ba saúde,” nia dehan.
Nia esplika, ida-ne’e mak orientasaun lima husi programa mandatu ba diresaun ezekutiva AMTL ba periodu 2025-2028, atu implmenta programa sira-ne’e hotu depende ba partisipasaun ativu ba membru hotu nian.
Nune’e, sei parseria di’ak ho Governu ho ajénsia atu bele fó apoiu no fó benifisiu atu bele projeta espetativa asosiasaun ba oin, nune’e haboot AMTL ba sosiedade bele kontribui di’ak liután ba melloramentu ba prestasaun servisu saúde ba komunidade iha Timor-Leste.
Jornalista : Felicidade Ximenes
Editór : Cancio Ximenes
