DILI, 17 Setembru 2025 (TATOLI) – Ekipa futeból VDL FC provizóriamente lidera tabela klasifikasaun zona apuramentu Liga Futeból Femeninu Timor-Leste (LFFTL) hafoin halakon São José ho eskore 7-0.
Ekipa VDL gaña vitória iha jogu daruak nune’e lidera provizóriu tabela klasifikasaun zona apuramentu LFFTL ho pontu 4 rezultadu husi jogu rua, manán ida no empata ida. 
Prezidente VDL FC, Dom Savio Lopes senti kontenti no agradese ba ekipa hotu, liuliu jogadór sira tanba rezultadu jogu maihusi prosesu naruk hanesan preparasaun nune’e ikus mai bele lidera tabela klasifikasaun zona apuramentu LFFTL.
“Ami senti kontenti, ida-ne’e tanba ami-nia preparasaun másimu mesmu seidauk serteza hakat ba primeira divizaun,” Prezidenti VDL informa ba TATOLI iha kampu Lelenok, Fatuhada, kuarta ne’e.
Maske ekipa Na’in-Feto FC rekolla pontu 4, maibe elementu Bernardino Soares iha pozisaun daruak tanba ekipa VDL iha produividade golu hamutuk sia rezultadu husi empata ho Na’in-Feto 2-2 no manán São José 7-0, enkuantu kompara ho ekipa Na’in-Feto FC prodús golu lima, rezultadu golu husi 2-2 ho VDL no gaña vitória 3-1 husi São José.
Iha jogu daruak ne’ebé realiza iha kampu Lalenok, Fatuhada, kuarta (17/09) ekipa VDL gaña pontu tolu husi São José, hafoin ekipa Femeninu husi Lahane manán ho eskore 7-0.
Husi rezultadu jogu referida, ekipa São José provizóriamente okupa iha zona mean no ameasa la hakat ba primeiru divizaun hafoin jogu rua laiha pontu hafoin derrota kontra Na’in-Feto FC no VDL FC.
Entretantu, tuir oráriu VDL sei kontinua jogu kontra Nain-Feto FC iha volta daruak iha kampu Lalenok, Fatuhada, loron-Sesta, 19 Setembru.
Jornalista : Natalino Belo
Editór : Evaristo Soares Martins
