DILI, 18 Setembru 2025 (TATOLI)—Estudante hamutuk rihun-lima (5000) kompostu husi Ensinu Sekundáriu, Ensinu Báziku Terseiru Síklu no Tékniku Vokasionál preparadu tuir ezame nasionál iha Munisípiu Baukau.
Husi totál numéru referidu maihosi estudante Ensinu Báziku Terseiru Síklu hamutuk 2.659 kompostu mane 1.344 no feto 1.315, Estudante Sekundária Jerál hamutuk 2.424 no Tékniku Vokasionál hamutuk 229.
“Husi Edukasaun Munisípiu rasik prepra vijilánsia hamutuk na’in-50 resin mak atu akompaña, ne’ebé tuir planu kada aula na’in-rua akompaña husi diretór sira,” Diretór Serbisu Munisipál Edukasaun Baukau, Afonso dos Santos da Costa informa liuhosi telefónema, Kinta ne’e.
Serbisu Munisipál Edukasaun Baukau halo planu hodi dezloka estudante sira hanesan Ensinu Báziku Terseiru Síklu sei konsentra iha sentru ezame 42, Ensinu Sekundáriu Sentru ezame 23 no Tékniku Vokasionál iha sentru ezame lima (5) ne’ebé tuir planu sei realiza ezama nasionál iha loron-28 Outubru.
“Edukasaun Baukau preparadu atu lori estudante sira tuir ezame referidu iha tempu besik,” Afonso informa.
Jornalista: Natalino Belo
Editór: Xisto Freitas da Piedade
