DILI, 18 Setembru 2025 (TATOLI)--Tribunál Primeira Instánsia Dili (TJPID), Kinta ne’e, kontinua halo julgamentu ba kazu furtu agravadu no arma branka ne’ebé envolve husi arguidu na’in-tolu ho inisiál ET, MMO no AM.
Iha audiénsia julgamentu ne’e ,Tribunál kolletivu ajendadu prosesu iha faze alegasaun. Ministeriu Públiku (MP) liuhusi Prokuradór Domingos Barreto alega arguidu na’in-tolu ho pena prizaun tinan-10 tanba tama loja xineza ida iha kampung baru Komoro no Likisá hodi foti subar sasán iha loja laran.
Iha sala julgamentu, Prokuradór Domingos Barreto deklara katak, durante julgamentu ba kazu ne’ebé arguidu na’in-tolu envolve, sira konfesa ba faktu ne’ebé konsta iha akuzasaun.
“Haree ba sirkutánsia ida-ne’e mak Ministériu Públiku haree katak arguidu na’in-tolu nia hahalok ne’e priense hotu ba krime tolu ne’ebé iha no aktu ne’ebé arguidu sira halo tama iha loja rua. Nune’e, Prokuradór mantein ho akuzasaun ne’ebé iha no konsidera katak faktus ne’ebé konsta iha akuzasaun provadu bazeia ba deklarasaun husi arguidu, no reforsa tan husi sasin sira ne’ebé arrola,” Domingos Barreto hateten iha sala julgamentu.
Notísia relevante : Tribunál julga arguidu na’in-lima ba krime furtu agravadu no arma branka
Tanba ne’e, MP laiha dúvidas no solisita ba Tribunál Kolektiva ida-ne’e atu kondena arguidu na’in tolu no kada arguidu hetan prizaun tinan sanulu
Enkuantu, husi parte Defeza, Advogadu Privadu Manuel Tilman, solisita ba Tribunál atu tetu sirkunstánsia hotu hodi bele aplika pena ne’ebé justu ba nia kliente na’in-tolu.
Hafoin rona tiha parte hotu, Tribunál marka fali julgamentu ba loron 02 Outobru 2025 tuku 09:00 dadeer hodi rona desizaun.
Audiénsia julgamentu ne’e prezide husi Juíz Kolektivu, Arjentino Nunes, Zulmira Auxiladora, Ivan Patrocino Suritai.
Jornalista : Natalino Costa
Editora : Julia Chatarina
