DILI, 18 Setembru 2025 (TATOLI)-Komisaun F iha Parlamentu Nasionál ba Asuntu Saúde, Igualidade Jéneru no Inkluzaun Sosiál, halo ona fiskalizasaun ba Oekusi no identifika katak postu saúde balun falta profisionál saúde, nune’e rekomenda ba Ministériu Saúde no Autoridade Oekusi atu toma atensaun.
Prezidente Komisaun F, Maria Gorumali Barreto, dehan kestaun rekursu umanu seidauk sufisiente, tanba tuir rekizitu, instalasaun saúde ida presiza iha médiku, parteira, enfermeiru no farmasista.
“Bazeia ba fiskalizasaun iha [Oekusi], postu saúde balun iha de’it parteira ou enfermeiru, maibé médiku laiha. Iha postu saúde balun kompletu. Kontinua rekomenda ba Ministériu Saúde tau prioridade ba iha rekursu umanu hodi responde nesesidade komunidade”, nia hato’o.
Aliende ne’e, Prezidente Komisaun F dehan fiskalizasaun ne’e identifika mós katak konstrusaun infraestrutura bá fatin izolamentu ne’ebé mai husi Fundu Covid-19 no armazein abandona hela, nune’e rekomenda ba autoridade Oekusi atu bolu atensaun ba empreza hodi finaliza obra.
Parte seluk, iha fiskalizasaun ne’e nota rezultadu pozitivu iha Oekusi katak la hasoru kestaun stockout ai-moruk no ida-ne’e bele sai referénsia ba ospitál rejionál sira seluk.
“Tanba, sira iha médiku espesialista ne’ebé foku duni iha farmásia, entaun ai-moruk ne’ebé diagnóstiku ba moras ne’e laiha, espesialista ne’e rekomenda kedas ai-moruk seluk”, dehan.
Nune’e solisita ba Ministériu Saúde presiza tau atensaun iha espesialista farmásia ba ospitál rejionál sira seluk, tanba dadaun laiha.
Jornalista: Nelson de Sousa
Editora: Maria Auxiliadora
