DILI, 18 Setembru 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, informa preparasaun ba eventu Dili Internasionál Maratona daudaun ne’e atinje ona 80%.
Notísia Relevante: Atleta atletizmu 18 preparadu kompete iha Dili Internasionál Maratona 2025
“Kona-ba ita-nia atleta lokál sira konfirmadu hotu ona. Atleta sira husi nasaun ASEAN mak to’o agora seidauk konfirmadu maibé antes fulan ne’e hotu, ita bele konfirmadu ona tanba eventu ne’e sei korrida kilometru 43,” Ministru Nelyo hateten ba Agência Tatoli iha Palásiu Governu, Dili, kinta ne’e.
Nia dehan, dadaun ne’e tama ona ba faze koordenasaun tékniku entre liña ministeriál hotu atu nune’e bele kontribui ba susesu eventu ne’e rasik.
Tuir ajenda ne’ebé iha, Dili Internasionál Maratona sei envolve mós atividade kulturál balu tanba fulan-Outubru hanesan fulan nasionál ba kultura Timor-Leste nian.
“Dili Internasionál Maratona ita sei envolve mós atividade kulturál balun. Ita hatene, Outubru hanesan fulan nasionál ba arte kultura Timor-Leste nian, entaun sei konsentra hamutuk iha Palásiu Prezidensiál, sei iha feira arte kulturál, sei iha Festivál ba hahan nian ba nasaun sira husi ASEAN tanba sira sei demostra sira-nia hahan. Ita sei iha mós jogu kiik-oan sira hanesan tiru kalik, halai taru karon, tiru berlindus no konsertu múzika,” nia hateten.
Eventu ne’e, Prezidente Repúblika, José Ramos-Horta mak sai hanesan patronu, hodi subliña ninia kompromisu ho unidade nasionál, saúde públika no solidariedade internasionál.
Eventu internasionál ne’e hala’o tanba daudaun ne’e Timor-Leste iha hela dalan atu integra ba ASEAN.
Eventu referidu apoiu husi Prezidente Repúblika, iha tinan ida-ne’e, Prezidente Repúblika prevee osan rihun $100 ba Dili Internasionál Maratona, maibé parte MJDAK sei kontribui rihun $70 ne’e hamutuk mós ho Vise-Primeiru-Ministru asuntu ekonomia.
Atividade ne’e sei envolve atleta timoroan sira hahú juveníl to’o seniór no sei envolve mós atleta estranjeiru sira maibé permite de’it ba nasaun sira membru ASEAN mak sei bele partisipa.
Kategoria ba manán-na’in sira hahú primeiru lugar to’o désimu lugar no orsamentu ba manán-na’in sira hahú husi $8000 tun to $200, enkuantu ba juveníl sira sei simu tuir sira-nia nesesidade.
Tinan ida-ne’e, Governu sente orgullu atu introdús kategoria prémiu tolu ne’ebé sei kompete iha eventu ne’e:
Maratona Internasionál Dili 2025 sei iha korrida oioin ne’ebé kompreensivu hodi akomoda nivel partisipasaun hotu-hotu.
Maratona Kompletu (Full Marathon): Kurrida ida-ne’ebé dezafiante ho distánsia kilometru 42.195 ba korredór elite no esperiente sira.
Meia-Maratona (Half Marathon): Korrida ida-ne’ebé populár ho distánsia kilometru 21.0975 ne’ebé oferese teste substansiál ida ba rezisténsia.
Eventu Para-Atleta sira (Para-Athletes Event): Kategoria dedikadu ida-ne’ebé asegura inkluzividade no selebra realizasaun sira husi atleta sira ho defisiénsia.
Fun Run: Korrida ida-ne’ebé badak liu, la’ós kompetisaun maibé perfeitu ba família sira, belun sira, no membru komunidade atu goza (enjoy) atmosfera festival.
Partisipante sira sei iha oportunidade únika atu halai liuhusi rota seníku sira Dili nian, hodi koko no haree kultura ne’ebé riku no tasi-ibun ne’ebé furak, enkuantu kontribui ba kauza ida-ne’ebé defende valór umanitáriu sira.
Kona-ba Maratona Internasionál Dili: Maratona Internasionál Dili nu’udar eventu desportivu anuál ne’ebé hala’o iha Dili, Timor-Leste, ho objetivu atu promove saúde, envolvimentu komunidade, no turizmu internasionál.
Ida-ne’e oferese kategoria korrida oioin hodi akomoda partisipante oioin no serve hanesan plataforma ida ba solidariedade nasionál no internasionál.
Rejistu ba Maratona Internasionál Dili 2025 sei loke ofisialmente iha fulan-Agostu tinan 2025. Eventu ne’ebé mark ona ba loron-sábadu, loron 11 fulan-Outubru tinan 2025, ho liña inísiu no finál ne’ebé marka ona iha fatin ikónika Palásiu Prezidensiál Nicolau Lobato, Bairru Pite, Dili.
Maratona Internasionál Dili kontinua sai simbólu unidade nasionál nian, hodi promove saúde, fitness no espíritu vibrante Timor-Leste nian iha palku globál.
Jornalista : Hortencio Sanchez
Editór : Cancio Ximenes
