DILI, 18 Setembru 2025 (TATOLI)—Ekipa VDL FC garante kompete iha primeira divizaun Liga Futeból Femininu Timor-Leste (LFFTL) hafoin gaña vitória iha jogu rua faze apuramentu.
Prezidente Klube VDL, Dom Sávio Lopez esplika durante jogu faze apuramentu kontra ona ekipa rua hanesan Na’in-Feto FC no São José ne’ebé gaña rezultadu pozitivu no kontinua halo preparasaun ba volta daruak, iha-ne’ebé otimista atu hakat bá primeira divizaun LFFTL.
“Ho pontu ne’ebé rekolla, ami fiar kata VDL avansa ona bá primeira divizaun,” Prezidente VDL informa ba TATOLI iha Kampu Lalenok, Lurumata, Kinta ne’e.
Notísia relevante: Klube futeból tolu sei kompete faze apuramentu antes hakat bá Liga Feminina
Lopez relata mezmu lidera tabela klasifikasaun maibé VDL seidauk festeja, orgullu ho esforsu hotu ne’ebé hatudu ona husi jogadór hamutuk ho ekipa treinadór sira tanba manán São José no impata ho Na’in-Feto FC.
Nia enkoraja jogadór sira atu mantein disiplina no kontinua treinu nune’e bele gaña pontu iha jogu volta daruak ne’ebé sei kontra tan Na’in-Feto no São José antes hakat bá primeira divizaun LFFTL.
Entretantu, tabele klasifikasaun hatudu provizoriamente VDL lidera zona apuramentu LFFTL ho pontu 4, rezultadu husi jogu rua, manán ida no impata ida.
Enkuantu, Na’in-Feto FC iha pozisaun daruak ho pontu 4 maibé produtividade menus husi VDL no São José okupa zona mean ho pontu 0, rezultadu husi derrota daruak.
Jornalista: Natalino Belo
Editór: Xisto Freitas da Piedade
