VIKEKE, 19 Setembru 2025 (TATOLI)—Koordenadór Ensinu Báziku Filiál Ualake, Aldeia Sana, Suku Uaitame, Postu Administrativu Uatulari, Munisípiu Vikeke, António Silveiro Amaral informa EBF Ualake-Sana saladeaula tolu de’it nune’e difikulta ba prosesu aprendizajen.
“Ami iha sala tolu foun, maibé la sufisiente ba ami hodi hala’o prosesu aprendizajen, tanba iha sala ida ami akumula estudante na’in-40 no na’in-30. Ida-ne’e sai hanesan difikuldade ba ami. Loloos ne’e estudante iha sala ida to’o de’it na’in-20, atu estudante sira aprende ho di’ak,” António Silveiro Amaral ba TATOLI iha EBF Ualeke-Sana, Sesta ne’e.
Koordenadór EBF Ualake ne’e hatutan limitasaun saladeaula profesór sira tenke fahe estudante sira troka malu sala, atu estudante sira asesu ba prosesu aprendizajen.
“Ami-nia salan limitadu ne’ebé fahe estudante sira balun tama dadeer no balun lorokraik. Ida-ne’e hanesan alternativu ida para estudante sira asesu ba prosesu aprendizajen. Aleinde ne’e mós ami laiha eskritóriu ba profesór sira. Ami laiha mós mobiliáriu liuliu armáriu rai livru nian, ne’ebé livru sira-ne’e ami rai de’it iha meza leten,” nia haktuir.
Nia dehan problema menus saladeaula no eskrítoriu ba profesór sira-ne’e aprezentadu ona ba inspetór edukasaun ne’ebé foin lalais mai vizita eskola, maibé to’o agora seidauk iha resposta ruma hodi solusiona.
“Tanba ne’e, ami hakarak husu ba Ministériu Edukasaun (ME) no autoridade Munisípiu Vikeke atu konstrui tan sala tolu ba ami atu ami bele uza ba prosesu aprendizajwn no eskritóriu ba profesór sira,” António informa.
Kona-ba prosesu aprendizajen, nia tenik, daudaun ne’e prosesu aprendizajen la’o di’ak, profesór sufisiente, karteira no meza foin lalais ME apoia ona hamutuk unidade 60.
Tuir dadus, estudante EBF Ualeke kompostu husi klase 1 to’o klase 6 ho totál estudante hamutuk na’in-90 no totál profesór ativu hamutuk na’in-haat kompostu husi feto ida no mane na’in tolu.
Jornalista: Vitorino Lopez da Costa
Editór: Xisto Freitas da Piedade
