DILI, 19 Setembru 2025 (TATOLI)–Diretór Edukasaun Munisípiu Likisá, Júlio da Silva informa daudaun ne’e rejistu ona finalista ne’ebé atu tuir ezame nasionál iha fulan-Outubru hamutuk 2.978.
“Edukasaun Munisípiu Likisá preparada atu realiza ezame nasionál, ein-termu profesór vijilánsia no mós ami halo preparasaun ba saladeaula sira-ne’ebé atu utiliza ba ezame nasionál ne’ebé sei akontese iha 20 Outubru ne’e,” nia informa ba TATOLI via WhatsApp, Sesta ne’e.
Nia hatutan hosi totál finalista ne’ebé sei tuir ezama nasionál ne’e utiliza sentru ezame hamutuk 24.
“Maibé, agora eskola sira seidauk prodús, tanba to’o ohin loron ita seidauk simu númeru ezame estudante sira-nian husi nasionál. Bainhira edukasaun nasionál atribui ona mai, mak ita sei orienta atu sira bele halo preparasaun,” nia informa.
Júlio dehan edukasaun munisípiu iha fulan hirak liu-bá, halo ona distribuisaun ba matrix ezame ba eskola sira.
“Kona-ba matrix ezame, ita distribui ona ba eskola sira iha fulan rua liubá atu profesór sira halo preparasaun ba matéria no fó ba estudante sira atu estuda,” Diretór ne’e haktuir.
Entretantu, daudaun ne’e Edukasaun Munisípiu Likisá simu ona lista finalista hamutuk 2.978, kompostu husi ensinu baziku hamutuk 1529, mane hamutuk 709 no feto hamutuk 824.
Aleinde ne’e, husi ensinu sekundáriu jerál hamutuk 1251, kompostu husi husi siénsia naturál hamutuk na’in-654, siénsia sosiál 597. Nune’e, husi eskola sekundária téknika vokasionál hamutuk na’in-198, kompostu husi mane na’in-100 no feto na’in-98.
Jornalista: Osória Marques
Editór: Xisto Freitas da Piedade
