Governu Vietname apoiu Timor-Leste adere ba ASEAN
DILI, 19 Setembru 2025 (TATOLI)—Ministru Negósiu Estranjeiru no Kooperasaun (MNEK), Bendito dos Santos Freitas ho delegasaun, hala’o enkontru bilateral ho Ministru Negósiu Estranjeiru Repúblika Sosialista Vietname interinu, Le Hoai Trung, hodi diskute kona-ba adezaun Timor-Leste nian ba ASEAN no reforsu kooperasaun bilateral iha pos-adezaun.
Sorumutu ne’e hala’o iha ámbitu vizita ASEAN Tour ba nasaun membru ASEAN hanesan kritériu ida husi Malázia ne’ebé nu’udar Prezidénsia ASEAN 2025, hodi hato’o Timor-Leste nia profundu agradesementu ba Estadu-membru sira-ne’ebé durante ne’e fó apoiu másimu ba Timor-Leste iha aspetu tékniku no polítiku iha prosesu preparasaun adezaun ba ASEAN.
Ministru Bendito Freitas hateten, Governu Vietname deklara sira-nia prontidaun tomak apoiu Timor-Leste nia adezaun ba organizasaun rejionál ne’e desde tinan 2011 bainhira Timor-Leste hato’o ninia pedidu formál atu tama ba ASEAN.
Iha pos-adezaun, Governu Vietname husu atu nasaun rua ne’e kria koordenasaun servisu ne’ebé besik liután ba atividade ekonómika, polítika no sosial no kultura ne’ebé iha ligasaun ho pilar importante tolu ASEAN nian.
“Ohin loron, ita-nia vizita ida mai ita simu konfirmasaun husi MNE Interinu katak, sira prontu tebe-tebes atu servisu ho ita iha área oioin liuliu iha nível ministeriál atu haree kona-ba prioridade ne’ebé sira bele halo ho ita entermu intervensaun konjunta, atu nune’e bele lori benefísiu mai ita,” Ministru Bendito hateten liuhusi nota ne’ebé Agência Tatoli asesu, ohin.
Ministru Bendito esplika, ASEAN hanesan grupu rejionál ida-ne’ebé forte no karaterizadu fortemente iha setór ekonómiku, wainhira Timor-Leste sai ona membru plenu ASEAN, sei intensifika liután kooperasaun ho Vietname iha área hanesan polítika-seguransa, ekonomia no sósiu-kultura, inklui mós setór sira ne’ebé ligadu ba dezenvolvimentu teknolojia, siénsia, edukasaun, saúde no seluk tan.
Nune’e, Ministro Bendito, espresa mós Timor-Leste nia ligasaun bilaterál ho Vietname ne’ebé forte no importante tebes ho Vietname, tanba Vietname hanesan nasaun ida-ne’ebé esperiensiádu kona-ba konstrusaun Estadu liuliu iha área reforma administrativa, reforma setór ekonómiku no governasaun.
Iha enkontru mós parte rua konkorda atu estabelese mekanizmu kordenasaun polítika iha futuru, nune’e bele asegura kooperasaun bilateral ida-ne’ebé estruturadu no orientadu ba área espesífiku sira.
Entretantu, sorumutu ne’e, Ministru Bendito Freitas akompañadu husi Embaixadór Timor-Leste ba Vietname, João Pereira, Diretora-Jerál ba Asuntu ASEAN, Elisa da Silva no Diretór Nasionál ba Sudeste Aziátiku, Vânio Florival, iha Hotel Pan Pacific Sidade Hanoi Vietnam.
TATOLI
