VIKEKE, 19 Setembru 2025 (TATOLI)—Abitante husi Aldeia Ossokaiua, Suku Afaloikai, Postu Administrativu Uatulari, Munisípiu Vikeke, Armindo Soares informa durante ne’e kondisaun estrada liga bá Aldeia Ossukaiua foho grave hodi difikulta populasaun sira transporta produtu lokál bá merkadu.
“Kondisaun estrada liga mai ami-nia aldeia iha tempu udan ami labele sai, izola ami hanesan illa Ataúru daruak mak ami. Tanba mota boot ida iha Ossokaiua laiha ponte nune’e ami labele lori sai ami-nia produtu lokál bá merkadu. Ida-ne’e mak sai hanesan dezafiu ida ne’ebé durante okupasaun Indonézia to’o ita ukun aan ami estrada mak nune’e,” Armindo Soares hateten ba TATOLI iha Ossokaiua, Sesta ne’e.
Armindo konta katak estrada husi Ossokaiua bá estrada boot purvolta kilómetru tolu, kondisaun estrada ne’e tahu nune’e iha tempu udan karreta sira labele mai iha Aldeia Ossokaiua tanba korta mós mota boot.
“Ami iha-ne’e maioria moris iha vida agrikultór, iha-ne’ebé moris ho produtu hanesan fehuk, modo, koto, fehukropa, hare no ai-fuan sira seluk. Ami hakarak produtu hirak-ne’e sai fali osan, maibé oinsá mak ami lori sai bá merkadu hodi ema sosa? Nune’e, produtu sira-ne’e ami prodús hodi han de’it mak barak,” nia esplika.
Armindo hatutan hadi’a ekonomia iha área rurál sai di’ak ne’e importante mak estrada, estrada di’ak mak populasaun sira foin transporta bá merkadu hodi ema sosa, atu populasaun sira bele hadi’a sira-nia moris.
Aleinde ne’e, nia tenik, moras emerjénsia ruma iha Ossokaiua iha tempu udan populasaun sira tenke hulan moras to’o kilo tolu hafoin ambulánsia tula.
“Iha-ne’e kuandu moras grave ruma iha Aldeia Ossokaiua tempu udan, difísil atu transporta bá sentru saúde tanba ambulánsia mós labele asesu to’o iha ami-nia aldeia. Ami sente estrada sai hanesan obstákulu ba ami iha área rurál,” nia haktuir.
Armindo haktuir katak preokupsaun ne’e populasaun sira hato’o beibeik bá autoridade sira no Governu, maibé to’o agora estrada seiduak rezolvida.
Nia ezije ba Governu hodi konstrui estrada liga bá Aldeia Ossokaiua hodi povu asesu no lori sira-nia produtu lokál ba merkadu, atu hadi’a ekonomia família.
Iha parte seluk, reprezentante Gabinete Inspesaun EDTL, E.P, Teodoro de Almeida Fernandes haktuir kondisaun estrada liga bá Aldeia Ossokaiua ho kondisaun aat liuliu iha tempu udan iha-ne’ebé karreta labele asesu no difikulta mós obra EDTL, E.P. implementa iha iha área rurál.
Tuir dadus, populasaun hela iha Ossokaiua foho ho totál uma-kain 30-resin, abitante hamutuk na’in-100.
Jornalista: Vitorino Lopez da Costa
Editór: Xisto Freitas da Piedade
