DILI, 19 Setembru 2025 (TATOLI)-Parlamentu Nasionál aprova ho unanimidade pedidu urjénsia kona-ba projetu Lei númeru 10/VI(3a) Rejime Jurídiku Seguransa Sosiál ba Titulár Órgaun Soberania ho votu a favór 59, kontra no abstensaun 0.
“Pedidu urjénsia pasa unanimidade”, Prezidente Interinu Parlamentu Nasionál no atuál Segundu Vise-Prezidente Parlamentu, Alexandrino Afonso Nunes, fó sai iha reuniaun plenária estraordinária, ohin.
Tuir relatóriu no pareser Komisaun A trata Asuntu Konstituisionál no Justisa, pedidu urjénsia ne’e iha nesesidade atu hetan aprovasaun iha plenária. Ho aprovasaun ne’e sei trata inisiativa ne’e ho urjénsia.
Tuir ajenda, debate jeneralidade sei realiza iha 25 fulan-Setembru.
Deputada FRETILIN, Nurima Ribeiro Alkatiri, nu’udar proponente projetu lei ne’e hateten matéria ida-ne’e hetan tratamentu urjente hodi fó resposta lalais ba saida maka sosiedade Timor-Leste presiza agora. Nakloke ba kontribuisaun hotu-hotu nian atu iha lei ida di’ak liu no reprezenta parte hotu nia hanoin.
“Projetu lei ne’e aprezenta tanba iha nesesidade urjente iha sosiedade. Ami, nu’udar proponente, loke dalan, maibé ami hatene katak parte hotu-hotu tenke kontribui atu hadi’a no ajusta testu tuir duni espetativa públiku nian”, nia hato’o.
Xefe bankada PLP, Maria Angelina Sarmento, realsa pedidu urjénsia hetan konsensuál hodi fó andamentu ba diskusaun.
“Depois ita aprova tiha pedidu urjénsia mak iha audiénsia ba jeneralidade bele ko’alia ona konteúdu lei. Hanesan proponente, husu ita atu apoiu no haree didi’ak fali karik bankada Governu iha proposta ou projetu lei mós bele tau iha meza halo diskusaun”, dehan.
Vise bankada CNRT, Patrocínio dos Reis Fernandes, seidauk pronúnsia, tanba agora aprova uluk votasaun pedidu urjénsia ne’e no sei hato’o hanoin bainhira iha diskusaun jeneralidade.
Relembra katak, iha loron 17 Setembru 2025, bankada parlamentár sira ho manifestante husi Estudante Universitáriu Timor-Leste (EUTL) iha konkordánsia asina ona akordu ida atu inisia diskusaun halakon Lei Pensaun Vitalísia ba meza Parlamentu ho pedidu urjénsia.
Projetu lei ne’ebé aprezenta ne’e atu halakon tiha Lei Pensaun Vitalísia no submete ba seguransa sosiál hanesan traballadór hotu kontribui.
Notísia relevante: Aban, PN debate urjénsia Rejime Jurídiku Seguransa Sosiál ba Titulár Órgan Soberania
Jornalista: Nelson de Sousa
Editora: Maria Auxiliadora
