Sentru Juventude Kovalima prioriza formasaun ba joven-sira
KOVALIMA, 19 Setembru 2025 (TATOLI)- Diretór Ezekutivu Sentru Juventude Kovalima (CJC), Julio Ferreira, relata iha tinan ne’e, prioriza programa formasaun hodi hasai abilidade joven sira iha munisipiu referidu.
Programa hirak ne’ebé prioriza mak formasaun komputadór, Inglés báziku, edukasaun bazeia ba abilidade moris (LSBE), relasaun saudavél , edukasaun sívika no internet saudavél.
“Ita implementa programa-sira bazeia orsamentu ne’ebé mai husi Ministériu Juventusde, Desportu , Arte no Kultura (MJDAK) iha tinan ne’e hamutuk $8.000 atu fasilita formasaun ba joven-sira ne’ebé mak hakarak aumenta nia konesementu liuhusi formasaun sira ”, Julío Ferreira relata ba TATOLI ,iha edifísiu CJC Kampung-Baru,ohin.
Programa loke kursu komputadór no lian inglés, durante ne’e joven-sira entusiazmu hodi tuir formasaun atu eleva sira-nia koñesementu, nune’e bele asesu merkadu traballu no prepara mós rekursu atu implementa podér lokál no desentralizasaun administrativa.
CJC implementa nia programa sira bazeia ba kalendáriu, nune’e daudaun programa balun CJC konsege implementa ona no balun seidauk konsege implementa maka hanesan programa internet saudavél ba joven-sira.
“Programa fasilita formasaun internet saudavél ba joven-sira seidauk konsege implementa tanba hasoru difikuldade hanesan menus rekursu umanu, maibé CJC kompromete implementa iha fulan-Outobru tinan ne’e,” nia afirma.
Tuir dadus funsionáriu ne’ebé daudaun presta servisu iha CJC hamutuk na’in-haat, kompostu husi Diretór, Jestór, finansa no officer ,maibé iha joven na’in-12 mak volontáriu ne’ebé servisu ho de’it tempu.
Jornalista: Celestina Teles
Editór:Florencio Miranda Ximenes
