DILI, 19 Setembru 2025 (TATOLI)—Prezidente Konsellu Kombatente Libertasaun Nasionál (CCLN-sigla portugeza), Vidal de Jesus “Riak Leman” informa veteranu rejistadu tinan 2009 sei simu uluk pensaun iha fulan-Dezembru 2025.
“Veteranu 21.000 mak sei simu direitu uluk. Enkuantu, veteranu hamutuk 61 mak halo kontestasaun ka reklamasaun. Iha fulan-Outubru mak ekipa sei tun fali bolu responsavel sira iha-ne’ebá hodi aprova,” Riak Leman dehan ba TATOLI via telefónika, Sesta ne’e.
Vidal de Jesus akresenta iha balun ne’ebé sei ba halo aprovasaun no sei bolu responsavel sira haree nia partisipasaun ne’e tanba sira-nia responsavel mak koñese sira.
Notísia relevante: Governu sei halo pagamentu ba lista kombatente ne’ebé laiha reklamasaun-kontestasaun
“Ami sei halo konferénsia, komesa iha Lospalos. Agora mai ona Oekusi. Iha Dili sei hala’o iha 24-26 Setembru. Rejionál sira mai hotu iha-ne’e. Ida taka sai mak laiha reklamasaun bele tama pensaun ba tinan ida-ne’e nian,” nia dehan.
Dadus veteranu rejistadu 2009 hamutuk 124.680. Liuhosi konteúdu ne’ebé mensiona iha Estatutu Kombatente Libertasaun Nasional, lei númeru 3/2006 no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu kombatente hanesan libertasaun nasionál ne ebé rejistadu iha tinan 2009.
Veteranu hamutuk 3.000-resin prosesada ba pagamentu
Iha parte seluk, Prezidente Konsellu Veteranu Munisípiu Lautein, Aurélio Freitas Ribeiro ‘Africoro’, hateten veteranu rejistadu 2009 hamutuk 3.000-resin mak prosesa ba pagamentu pensaun hodi simu direitu iha Dezembru tinan ne’e.
“Veteranu rejistadu 2009 ho grau 8 a14 iha rihun-tolu (3.000)-resin mak laiha kontestasaun no reklamasaun. Sira-ne’e sei prosesada ba pagamentu iha Dezembru tinan ne’e,” Africoro tenik ba TATOLI via telefónika, Segunda ne’e.
Aurélio Freitas hatutan restante ne’e hadi’a ba faze daruak nian ne’ebé sei akontese iha 2026, maibé depende ba orsamentu jerál Estadu (OJE) 2026 nian.
Aurélio Freitas hatutan kontestasaun no reklamasaun ne’e fahe ba rua.Ida, na’in mak kontesta nia dadus balun ne’ebé la loos. Pur-ezemplu, naran mak la loos ka loron moris mak la loos ne’e mós konsidera hanesan kontestasaun.
Rua, ema seluk mak kontesta nia, tanba bele konsidera dadus ne’ebé fornese ba verifikasaun ne’e la loos. Pur-ezemplu, hanesan ne’e mak iha balun kontesta, balun hakerek sein kompletu, sira bele kompletu nia dokumentu. Sira-ne’ebé hetan kontestasaun, se na’in mak kontesta hadi’a nia dadus ne’e laiha problema.
“Se ema seluk mak kontesta entaun ne’e hein ba reverifikasaun fulan Outubru nia laran,” nia akresenta.
Iha sorin seluk, Sekretáriu Estadu Veteranu (SEV), Cesár dos Santos da Silva informa veteran sira husi Munisípiu Lautein nian hamutuk 9.612 no ne’ebé mak hetan validasaun hamutuk 8.616 no seidauk hetan validasaun hamutuk 996.
Jornalista: Osória Marques
Editór: Xisto Freitas da Piedade
