DILI, 22 Setembru 2025 (TATOLI) – Ministériu Transporte no Komunikasaun, liuhusi Diresaun Nasionál Transporte Terrestre (DNTT) planeia atu moderniza semáforu sira ne’ebé aat iha kapitál.
Xefe Manutensaun Sinál Tránzitu iha DNTT, João Eugénio da Silva, hateten semáforu sira iha Dili foin haat mak moderniza ona no restu ne’e labele halo manutensaun, tanba DNTT sei moderniza hotu.
“Ita rekolla ona dadus, tuir planu, moderniza hotu semáforu sira ne’ebé aat, inklui instalasaun foun hamutuk 11”, João Eugénio da Silva dehan ba Tatoli, ohin.
Nia esplika katak semáforu 11 ne’e, ba instalasaun foun tolu hanesan tau iha Elemloi, Ai-mutin no Kuluhun de Baixu, restu ne’e halo de’it instalasaun nafatin ba na fatin sira hanesan iha kruzamentu Balide, Vaganza, Vila Verde, Kolmera, Audian, Bidau (Tokobaru), Bidau Lesidere no iha Eletrisidade de Timor-Leste (EDTL) Vila Verde.
Nia subliña katak semáforu sira ne’e tuir planu atu moderniza iha tinan ne’e ka tinan oin, tanba orsamentu tama iha Fundu Infraestrutura, prosesu ne’e rasik agora iha ona Ajénsia Dezenvolvimentu Nasionál (ADN) hodi halo verifikasaun no iha tempu badak sei lansa konkursu públiku.
Iha sorin seluk, Ministru Planeamentu no Investimentu Estratéjiku, Gastão de Sousa, hateten semaforu ne’e rasik prosesu agora iha ADN no bainhira verifika hotu mak mak Konsellu Administrasaun Fundu Infraestrutura (KAFI) prevee orsamentu ba projetu ne’e.
Nia esplika katak projetu ne’e tama iha Fundu Infraestrtutra, la signifika tau kompletu kedas montante orsamentu, maibé fleksibilidade tau uluk de’it rihun $500 to’o to’o $100 no atu ezekuta ba mak halo transferénsia osan, tanba ezekusaun ne’e la’ós hotu kedas agora no bele kontinua iha tinan oin.
Notísia relevante: Instalasaun ba semáforu modernu foun iha Dili kuaze konklui
Jornalista: Arminda Fonseca
Editora: Maria Auxiliadora
