DILI, 22 Setembru 2025 (TATOLI)—Primeiru-Ministru, Kay Rala Xanana Gusmão klarifika asaun solidariedade ne’ebé Governu Timor-Leste halo doasaun ba vítima inundasaun iha provínsia Bali (Indonézia) ho montante miliaun $2,5 ne’e hanoin hikas mensajen husi amu Papa Francisco nian kona-ba “Fraternidade Umana”.
Notísia Relevante: Timor-Leste fó doasaun millaun $2,5 ba inundasaun iha Bali
“Ne’e la’ós foin akontese dahuluk ita haruka osan ba ema ne’ebé infrenta problema (terus) maibé ita haruka on aba fatin barak”, Primeiru-Ministru esplika ba jornalista sira iha sala VIP, aeroportu Komoro, ohin.
Xefe Governu ne’e hateten, TL la fó tamba rai ida-ne’e atu amigu ka la amigu, fó tanba ema sira-ne’e terus tanba ohin no TL mós fó ba nasaun Marocco, maske nasaun ne’e ita ladún iha ligasaun di’ak maibé polítika ida-ne’ebé di’ak tanba rai nakdoko hamate ema barak entaun TL la’ós fó ba Governu Marocco maibé fó ba ema sira ne’ebé presiza.
“Ne’ebé fraternidade umana ne’e ne’e katak iha sidadaun lubuk ida maka pertense ba mundu tomak, maske rai boot balun mak besik hela sira, maibé ita fó netik uitoan hanesan solidariedade no saida mak amu Papa Francisco hanorin ida-ne’e mak ita presiza hatudu,” nia hateten.
Fó hanoin fali katak akontesimentu inundasaun iha provínsia Bali (Indonézia) hahú akontese udan-boot iha tersa (09 Setembru /2025) kalan to’o kuarta (10 Setembru 2025) dadeer, halo mota balun nakonu ho sistema drainajen hodi hamosu inundasaun no akontesementu ne’e rezulta estraga uma atus resin no ema na’in-18 mak mate.
Jornalista : Alexandra da Costa
Editór : Cancio Ximenes
