DILI, 04 Setembru 2025 (TATOLI)—Governu liuhusi Ministru Obras Públika, Samuel Marçal husu ba komunidade no Maubisse-oan sira atu nafatin dezenvolve kultura, tanba kultura ne’e mak identidade lolos Timor-Leste nian.
“Ba inan-aman sira tenke promove nafatin ita-nia kultura no tradisaun liuliu dansa kulturál, tanba ohin ha’u hare komunidade simu ho dansa kultura ne’ebe kapa’as tebes,” Ministru ne’e informa ba jornalista sira iha atividade lansamentu estrada iha Rileku, Maubisse, ohin.
Tamba ne’e, nia dehan, kultura labele halakon ho kondisaun modernu, atu nune’e kultura Timor labele lakon tenke maibé tenke hatutan ba jerasaun foun sira no Maubisse tenke hatudu ninia kultura ne’ebé forte ba Timor.
“Liuhusi lori nafatin ita boot sira-nia tais no produtu tradisionál seluk ba promove iha merkadu lokál no nasionál,” nia apela.
Iha biban ne’e, xefe suku Maubisse Villa, Wilson Mendonça hateten mensajen ne’ebé Ministru Obra Públika husik hela ne’e importante tebes tanba Timor moris ho ninia identidade mak kultura.
“Tanba ne’e, ita tenke prezerva nafatin ita-nia kultura to’o ba jerasaun foun sira. Labele aproveita maka dansa modernu sira maibé tenke aprende liu ita-nia dansa kultura rasik,” nia dehan.
Maubisse nia kultura ne’e forte tebes, katak dezde uluk to’o agora ne’e komunidade sei kontinua prezerva ho di’ak no sai hanesan tradisaun ida iha munisípiu ne’e rasik.
Reprezentante komunidade, Júlio Salsinha Barreto, hateten sira prontu kontinua hanorin sira-nia oan kona-ba kultura Timor nian, nune’e jerasaun foun sira nafatin iha koñesementu kona-ba kultura no tradisaun.
“Tanba, ita haree agora ho era teknolojia labarik barak mak gosta uza teknolojia, tanba ne’e sira labele domina liu ba situasaun modern. Presiza prezerva nafatin ita-nia kulutura iha ita-nia moris,” nia dehan.
Jornalista : Alexandra da Costa
Editór : Cancio Ximenes
