DILI, 16 Setembru 2025 (TATOLI)—Sekretaria Estadu Kooperativa (SEKoop) asina nota entendementu ho empreza Bali Honey Madu husi Indonézia atu halo peskiza bá fatin potensiál sira hodi haki’ak bani iha Timor-Leste (TL).
Sekretáriu Estadu Kooperativa, Arsénio Pereira, hateten akordu ne’ebé parte rua halo ne’e bolu A Letter of Agreement (LoA) ne’ebé empreza mai atu halo peskiza boot ida hodi haree Timor-Leste nia fatin ne’ebé iha potensialidade bele haki’ak bani.
Tuir dadus SEKoop, iha munisípiu lima mak potensiál ba haki’ak bani mak hanesan Ermera, Likisá, Aileu, Manatutu no Bobonaru, maibé kuaze Timór laran tomak bele hotu tanba iha bani.
“Ohin ita asina ona akordu, sira sei iha ne’e semana ida halo peskiza. Ita-nia kooperativa sira ne’ebé antes ne’e halo ona kultivasaun ba bani, akompaña fali sira bá Indonézia hodi haree diretamente kultivasaun bani iha ne’ebá. Fila mai aplika, tanba haki’ak bani la naran, maibé iha maneira rasik, inklui nia produsaun”, Arsenio Pereira dehan iha salaun SEKoop, iha Akait, ohin.
Tuir nia, importante tebes halo produsaun ba bani-been, tanba durante ne’e seidauk utiliza didi’ak, entaun ema fa’an leba bá-mai de’it. Ho apoiu husi Bali Honey Madu sei ajuda kooperativa sira oinsá bele halo kultivasaun di’ak, halo embalajen di’ak ho kualidade mak fa’an.
“Orsamentu ne’ebé ita prevee ba atividade sira ne’e hamutuk rihun $3. Akordu ne’ebé ita halo ne’e vale ba tinan rua, ne’ebé antes ramata mandatu ita-nia tékniku sira halo dezeñu, halo kooperasaun ho Bali Madu”, dehan.
Prezidente Empreza Bali Honey Madu, Ismail Marzuki, agradese tebes ba Governu Timor-Leste, tanba kooperasaun ida-ne’e hahú ona dezde tinan 2018.
“Ami-nia prezensa iha ne’e atu haree fatin potensiál ba produsaun bani-been hodi fahe ami-nia esperiénsia hodi apoiu Timor-Leste halo produsaun bani-been iha rai-laran”, dehan.
Nia subliña esperiénsia ne’ebé sira sei fahe ba Timor-Leste mak hahú husi maneira haki’ak, prodús no to’o marketing.
“Aban, ami sei vizita bá munisípiu lima ne’ebé la hanesan iha loron lima oin mai no hahú halo mapeamentu ba poténsia ai-funan sira ne’ebé iha kualidade aas iha Timór bele dezenvolve”, dehan.
Notísia relevante: SEKoop haruka kooperativa Timor-Leste aprende haki’ak no prodús bani-been iha Bali
Jornalista: Arminda Fonseca
Editora: Maria Auxiliadora
