DILI, 12 Setembru 2025 (TATOLI)— Governu Timor-Leste hato’o solidariedade profunda ba povu, Governu Indonézia, no autoridade Provínsia Bali, ne’ebé afeta ba inundasaun iha loron hirak liubá.
Solidariedade ida-ne’e hasai liuhusi reuniaun Konsellu Ministru ne’ebé aprova ona projetu Rezolusaun Governu nian ne’ebé aprezenta hosi Primeiru-Ministru Kay Rala Xanana Gusmão kona-ba kontribuisaun ida ba Provínsia Bali hafoin inundasaun iha rejiaun ne’e.
“Doasaun millaun $2,5 ba Provínsia Bali, ho intensaun hodi apoia esforsu asisténsia umanitáriu nian no rekuperasaun hosi populasaun ne’ebé afetadu”, haktuir komunikadu Governu nian.
Tuir nota ne’e, udan boot iha Bali kauza mota nakonu no rai halai, hodi rezulta pelumenus ema na’in-14 mate, ema barak lakon no ema atus ba atus mak dezlokadu.
Aleinde ne’e, dezastre ne’e hamosu estragu maka’as ba uma sira, estrada, ponte, no infraestrutura sira seluk, nomós atividade ekonómika lokál komunidade, inklui área turístika prinsipál sira Bali nian, hetan mós perturbasaun signifikativa.
Hanesan relata hosi ANATARA News (12 Setembru), Ajénsia Nasionál Jestaun Dezastre relata katak husi inundasaun ne’e númeru mate aumenta ba 16.
Númeru refujiadu ne’ebé rejista maizumenus 562, husi númeru ne’e na’in-327 iha Jimbaran no ema 235 iha Denpasar. Dezastre ne’e akontese tanba kauza udan-boot ne’ebé akontese liu oras 24 dezde loron 09 Setembru 2025.
Jornalista : Arminda Fonseca
Editora : Maria Auxiliadora
