VIKEKE, 22 Setembru 2025 (TATOLI)—Diretór Servisu Edukasaun Munisípiu Vikeke, Júlio Sakadura infoma estudante finalista 2025 husi Munisípiu Vikeke hamutuk 3.077 mak sei partisipa ezame nasionál ne’ebé Ministériu Edukasaun (ME) realiza iha fulan-Outubru tinan ne’e.
“Kona-ba preparasaun ba ezame nasionál ami halo enkontru ho diretór eskola sira iha Munisípiu Vikeke hodi prepara ita-nia estudante sira hasoru ezame nasionál no estudante sira-ne’ebé atu partisipa iha ezame nasionál hamutuk na’in-3.077,” Júlio Sakadura hateten ba TATOLI iha Postu Vikeke Vila, Segunda ne’e.
Diretór Servisu Edukasaun Munisípiu Vikeke ne’e aprofunda prosesu preparasaun ba matéria daudaun ne’e profesór sira kontinua hanorin estudante sira, atu estudante sira pepara sira-nia aan hodi hasoru ezame nasionál.
“Atu hasoru ezame nasionál kada eskola idak-idak sei prepara komisaun ida hodi hasoru ezame nasionál iha fulan oin, enkuantu ba pontu ezame nasionál Ministériu Edukasaun (ME) liuhusi kurríkulu,” nia hato’o.
Júlio haktuir Servisu Edukasaun Munisipál Vikeke distribui ona kalendáriu ba ezame nasionál nian ba kada eskola sira iha Munisípiu Vikeke atu profesór sira no estudante sira prepara aan ba ezame nasionál.
Nune’e, nia husu estudante finalista sira tenke partisipa prosesu aprendizajen iha eskola, hodi simu matéria oferesidu husi profesór sira tanba fulan oin hasoru ezame nasionál.
“Ha’u hakarak apela ba estudante sira labele falta iha prosesu apredizajen. Tenke aproveita simu matéria sira husi profesór, tenke esforsa estuda, atu hasoru ezame nasionál atubele hetan valór di’ak,” Júlio sujere.
Tuir dadus, eskola sira-ne’ebé partisipa iha ezame nasionál hamutuk 44 kompostu husi ensinu báziku, sekundáriu no tékniku vokasionál.
Jornalista: Vitorino Lopez da Costa
Editór: Xisto Freitas da Piedade
