Kombatente na’in-269 iha Kovalima presiza kompleta dokumentu

KOVALIMA, 22 Setembru 2025 (TATOLI)- Konsellu Munisipál Kombatente Libertasaun Nasionál Munisípiu (CMCLN) Kovalima, kontinua atende ba kombatente na’in-269 ne’ebé bazeia lista editál fó sai presiza atu kompleta sira-nia dokumentu.

“ Bazeia ba dadus editál husi Kovalima  kombatente hamutuk  na’in-1,602 maka submete sira-nia dokumentu. Husi númeru ne’e ita-nia  kombatente ne’ebé mak la presiza submete ona dokumentu na’in-1,148 , kombatente na’in-269 nia dokumentu la kompletu, nune’e presiza kompleta dokumentu no kombatente na’in-185 la eleje razaun relasaun família la tuir lei, falla iha dokumentu”,  Sekretáriu CMCLN Kovalima, Joaquim Barros “ Sikat le’et”, informa ba TATOLI iha edifisiu  Tabakolot.

Ho nune’e, Kombatente ne’ebé maka la hetan kontestasaun no reklamasaun, daudaun kontinua submete ona sira-nia dokumentu ba dahuluk sei prenxe rekerimentu, sertidaun baptismu, sertidaun RDTL, Billete Identidade no Kartaun Eleitorál.

Daudaun ne’e, kombatente sira kontinua submete sira-nia dokumentu hodi kompleta sira-nia dokumentu ba kombatente ne’ebé maka foin lalais ne’e publika iha lista editál iha kategória 15 a 19, 8 a 14 no família martir sira ne’ebé maka nia dokumentu la kompletu. Durasaun submete dokumentu hahú iha fulan- Setembru to’o fulan- Outubru 2025 .

“Ba kombatente ne’ebé maka hetan kontestasaun sira- seidauk bele hetan nia direitu no sei iha prosesu,  nune’e pesoál presiza mós submete reklamasaun bainhira la merese atu  hetan kontestasaun depende  no nia prosesu  bele lori malu ba iha tribunál”, nia afirma.

Tuir kalendáriu MAKLN sei  halo pagamentu  ba sira ne’ebé maka lahetan kontestasaun no reklamasaun husi kategória 15 a 19, 8 a 14 bele hetan ona sira-nia direitu ba subensaun iha fulan-Dezembru 2025 ne’e.

Jornalista: Celestina Teles

Editór:Florencio Miranda Ximenes