DILI, 22 Setembru 2025 (TATOLI)—Ministériu Obra Públika (MOP) hala’o sorumutu no enkontru ho Uniaun Estudante Universitáriu Munisípiu Ermera (UEUMER) hodi relata kona-ba prosesu aprovizionamentu ba reabilitasaun estrada Ermera ne’ebé durante ne’e públiku sempre kestiona maibé estrada Ermera mos Governu tau prioridade ba programa dezenvolvimentu insfraestrutura.
Notísia Relevante: Konstrusaun estrada Ermera sei hein nota aseitasaun husi Banku Mundiál
Ministru Obras Públika, Samuel Marçal, hateten objetivu ohin loron ne’e atu fó hanoin ba malu tamba dalaruma estudante sira-ne’e mós rona informasaun ne’ebé ladun konvensidu nune’e hodi hamosu konfuzaun kona-ba prosesu reabilitasaun estrada Ermera nian.
“Ohin, sira mai hodi rona lolos prosesu estrada ne’e to’o iha ne’ebé ona. Ezijénsia ne’e tanba sira preokupa tebes ho kondisaun Estrada. Ha’u rekoñese katak loos duni tanba ba bainhira tempu udan difikulta ema hotu atu halo movimentasaun dalaruma mós mosu asidente,” Ministru ne’e informa ba jornalista sira iha nia kna’ar fatin, Kaikoli, ohin.
Governante ne’e dehan, ema hotu hakarak prosesu ne’e bele aselera lalais no Governu laiha hanoin ida katak atu abandona ka latau matan ba kondisaun estrada Ermera nian, buat sira-ne’e iha hotu ona programa Governu nian ne’ebé atu halo dezenvolvimentu insfraestrutura liuliu ba área rurál sira.
“Baibain ne’e imi haree ita halo lansamentu ba estrada urbana sira-ne’e tanba ho kustu ne’ebé ki’ik no aprova lalais, maibé reabilitasaun estrada dirasaun ne’e uza fundu infraestrutura ho kustu ne’ebé boot kuaze millaun $40-resin, aleinde ne’e tanba fundus impréstimu husi Banku Mundiál,” nia esplika.
Antes ne’e, nia parte submete ona proposta ne’e ba Ministériu Planeamentu no Investimentu Estratéjiku (MPIE) liuhusi Komisaun Nasionál Aprovizionamentu (CNA) iha 27 Setembru 2024 no sira mós entrega ona proposta ba Banku Munidál, maibé proposta ne’ebé iha sira haruka fali ba CNA hodi kompleta tan rekezitu balun.
“Tuir informasaun ne’ebé ha’u hetan sira CNA mós submete fali ona proposta ne’e ba iha Banku Mundiál iha loron sesta (19 Setembru 2025), nune’e ita hein de’it rezultadu. Fiar katak sira bele aprova lalais nune’e tempu badak ita bele implementa tanba kompañia mós iha ona mak emprexa Xixi Jewelry Co,” nia informa.
Iha biban ne’e, Prezidente Uniaun Estudante Universitáriu Munisípiu Ermera, Zaqueu Maia de Araújo, hateten iha enkontru ida-ne’e la’ós atu fó presaun ka ameasa ba malu maibé hanesan juventude no sidadun ida presiza ezije dezenvolvimentu insfranstrutura bazeia ba kompromisu eleitorál ne’ebé governante sira sempre ko’alia bainhira halo kampaña ba eleisaun.
“Bainhira estrada Ermera mak di’ak ona ne’e la’ós benefísiu mai ami de’it maibé ba ema hotu, tamba dalan ne’e la’ós ami mesak uza maibé ema hotu mak sei uza hodi halo movimentu ba-mai. Entaun, ohin, ami mai para hatene loloos prosesu aprovizionamentu ne’e,” nia hateten.
Nia dehan, povu ninia ezijénsia mak ne’e dezenvolvimentu infraestrutura hanesan estrada, bee no eletrisidade, tanba buat hirak ne’e la difikulta sira-nia atividade, nune’e sira reprezenta povu Ermera hodi hato’o preokupasaun sira ne’e ba Governu hodi rezolve.
Jornalista : Alexandra da Costa
Editór : Cancio Ximenes
