DILI, 22 Setembru 2025 (TATOLI)—Ekipa Na’in-Feto FC hakat bá primeira divizaun hafoin rekolla pontu ualu (8) iha jogu ikus faze apuramentu Liga Futeból Femininu Timor-Leste (LFFTL).
Elementu Treinadór Bernardino Soares serteja hakat bá primeira divizaun LFFTL hafoin iha jogu ikus rekolla pontu tolu (3) husi São José ho rezultadu finál 2-0 ne’ebé realiza iha kampu Lalenok, Fatuhada, Dili, Domingu (21/09/2025).
“Sente orgullu tanba hakat ona bá primeira divizaun maibé ida-ne’e todan. Ami presiza fera ulun tanba kompetisaun sei kompetitiva,” Treinadór Na’in-Feto FC, Bernardino Soares informa ba TATOLI liuhosi telefónika, Segunda ne’e.
Notísia relevante: Na’in-Feto FC gaña pontu tolu husi São José
Na’in-Feto FC rasik durante jogu faze apuramentu manán daruak bainhira manán São José kompostu volta dahuluk 1-3 no volta daruak 2-0.
Aleinde ne’e, impata daruak ho VDL FC iha-ne’ebé volta dahuluk ekipa rua ramata jogu ho skor 2-2 no volta daruak rezultadu finál 4-4.
Ho totál pontu ualu (8) ne’ebé rekollidu, ekipa Na’in-Feto FC serteja hakat bá primeira divizaun LFFTL hafoin rezultadu hatudu lidera tabela klasifikasaun.
Enkuantu, São José FC rasik obrigadu tenke hakoi mehi hakat bá LFFTL tanba rekolla pontu 0 durante faze apuramentu no VDL iha pozisaun daruak ho pontu lima (5) no sei hela jogu ikus kontra São José ne’ebé tuir órariu sei realiza iha kampu Lalenok, Tersa (23/09/2025).
Jornalista: Natalino Belo
Editór: Xisto Freitas da Piedade
