DILI, 22 Setembru 2025 (TATOLI)–Xefe Estadu Maiór Jenerál Forsa Armada (XEMGFA), Tenente Jenerál Domingos Raul ‘Falur Rate Laek’ komprometidu atu kontinua fortifika formasaun ba membru FALINTIL-Forsa Defeza Timor-Leste (F-FDTL) iha ámbitu adezaun ba Asosiasaun Nasaun Dudeste Aziátiku (ASEAN, sigla inglés).
“Ita kontinua fortifika ita-nia formasaun iha rekursu umanu, kuandu ita adere ona ASEAN ita husu ba sira (Austrália) no Portugal tanba ita-boot sira hatene nasaun sira ne’ebé durante ne’e apoia ita barak iha formasaun rekursu mak sira ne’e,” Tenente Jenerál Falur hatete ba jornalista sira, iha Estádiu Munisipál Dili, Segunda ne’e.
Notísia relevante : INDMO no South Australia Skills asina akordu kona-ba Formasaun iha Konstrusaun Sivíl
Nia dehan, membru sira tenke aposta ba formasaun hodi nune’e Militár sira bele adapta-an ba siénsia no teknolojia dijitalizaun, hanesan mudansa sira daudaun.
“Ita kontinua aposta ba rekursu umanu, ita la aposta ne’e ó jornalista ne’e la dezenvolve ó nia-an, teknolojia liu fali ó nia matenek horisehik nia, entaun ó la la’o,” nia akresenta.
Jenerál Falur katak, bainhira Timor-Leste adere ona ba ASEAN maka instituisaun F-FDTL sei la’o tuir kapasidade no kbiit, liliu tuir progresu no avansu sira.
“Ami bele halo buat ne’ebé ita bele halo, ita labele bá duni ema nia dezenvolvimentu ne’e. Ema sira ne’e kleur ona ukun-an, ne’ebé agora serbisu ho siénsia no sistema teknolojia ne’ebé iha mundu ne’e,” nia tenik.
Jornalista : Natalino Costa
Editora : Julia Chatarina
