BOBONARU, 22 Setembru 2025 (TATOLI) – Servisu Munisipál Planu Dezen volvimentu Integradu Munisipál (PDIM), Autoridade Munisípiu Bobonaru, utiliza orsamentu poupansa 2025 hodi implementa projetu foun mak konstrusaun sala maternidade iha Sentru Saúde Kailaku no sala rua iha edifísiu autoridade munisipál.
Diretór Servisu Munisipál PDIM Bobonaru, Rui Bere Mau Barros, konfirma katak projetu ne’e implementa liuhusi votasaun husi membru Konsellu Koordenasaun Munisipál iha reuniaun foin lalais ne’e.
Rui Bere subliña orsamentu poupansa ne’e hamutuk $151.908,33, husi orsamentu alokadu ba projetu neen ho nia montante rihun $910, inklui orsamentu balu husi projetu manutensaun edifísiu administrasaun postu administrativu neen no edifísiu Autoridade Munisípiu Bobonaru.
“Orsamentu restu ne’e ita uza ona hodi halo uma maternidade iha postu administrativu Kailaku. Agora ba dezeñu tékniku sira prepara ona, ita halo tan sala rua ho razaun tanba fatin iha ne’e la sufisiente. Entaun, diresaun rua ka tolu hamutuk de’it”, nia hateten.
Projetu PDIM 2025 hamutuk neen mak hanesan reabilitasaun jardín iha Maliana ne’ebé daudaun ne’e ninia progresu fizíku atinje ona 61,67%; reabilitasaun rezidénsía ba pesoál saúde iha Sentru Saúde Komunitáriu postu administrativu Bobonaru atinje 46,53%; konstrusaun uma maternidade iha SSK Ritabou 55,68%, konstrusaun sala tolu iha EBF Beamoas, iha suku Kolimau 51,78%, konstrusaun sala neen iha EBC Samutaben, iha suku Manapa, postu Kailaku atinje 63,03%; no konstrusaun irrigasaun Genumatan, iha suku Ritabou atinje 31,12%.
Tuir observasaun téniku PDIM, projetu lima seluk nia progresu la’o maka’as, maibé konstrusaun irrigasaun Genumatan mak la’o tarde, tanba implementa tarde ho razaun natar-na’in sira foin kolleta hare.
Rui Bere salienta katak daudaun ne’e empreza sira submete ona pedidu estensaun, tanba maioria obra ne’ebé realiza liu ona tempu determinadu.
“Iha 27 Abríl ne’e, ita asina kontratu no remata ne’e Setembru, tanba materiál fabrikadu hameno husi loja tarde ne’e mak agora sira halo pedidu estensaun fulan ida. Kuandu la remata sira estende to’o loron 01 Dezembru, tanba ita planu retensaun 10% ne’e sei halo kuandu sira finaliza iha Dezembru, ita halo pagamentu finál. Kuandu sira la finaliza retensaun ne’e, ita sei muda ba tinan 2026”, nia esplika.
Iha proposta orsamentu 2026 ne’e, Autoridade Munisípiu Bobonaru mós prevee verba retensaun projetu lima hanesan konstrusaun uma maternidade iha suku Ritabou ho montante $10.801, konstrusaun sala tolu iha EBF Beamoas ho montante $11.401, reabilitasaun um aba pesoál saúde Bobonaru $11.146, konstrusaun sala neen EBC Samutaben $16.226 no konstrusaun irrigasaun Genumatan ho montante $45.886.
Notisía relevante: AMB koordena ho kompañia E724 reabilita morru merkadu Mau-mali
Jornalista: Sergio da Cruz
Editora: Maria Auxiliadora
