Autoridade Lakluta observa projetu reabilitasaun estrada
VIKEKE, 23 Setembru 2025 (TATOLI)—Administradór Postu Administrasaun Lakluta, Munisípiu Vikeke, Pascoal Gama Martins, Terse ne’e, halo observasaun direta ba servisu reabilitasaun estrada kilómetru 14 husi Suku Luka Rai-Hun liga bá Postu Lakluta.
“Ohin ha’u bá haree direta empreza responsavel sira-nia servisu ba reabilitasaun estrada. Progresu servisu ne’ebé empreza implementa komesa dudu ona estrada no halo luan estrada husi Rai-Hun Luka nian no empreza hamoos estrada purvolta metru 300,” Pascoal Gama Martins ba TATOLI hafoin ramata observa projetu reabilitasaun estrada.
Autoridade Lakluta ne’e haktuir projetu rebilitasaun ne’e populasaun Lakluta kontribui gratuita sira-nia planta hanesan hudi no ai-horis sira laiha indemnizasaun tanba populasaun sira hakarak estrada di’ak hodi asesu.
“Durante tempu naruk ita-nia populasaun preokupa ba estrada ne’ebé liga bá Postu Lakluta, tanba ne’e empreza hala’o sira-nia servisu hanesan plantasaun sira-ne’ebé kona estrada ita-nia populasaun sira oferese gratuita ba empreza hasai tiha,” nia hato’o.
Pascoal haktuir obra reabilitasaun estrada ne’ebé Governu implementa iha Postu Lakluta foin faze dahuluk, tanba ne’e hanesan autoridade agradese ba Governu ba implementasaun projetu reabilitasaun estrada.
Kona-ba reabilitasaun estrada husi Luka Rai-Hun to’o Suku Dilór, Postu Lakluta, Ministériu Obra Públika (MOP) fó kontratu ba empreza rua mak hanesan númeru: SSS/136/MOP-2025, ho nia medida Sta.0+000-7+000 km, ba Empreza Hoven II Unip, Lda, enkuantu númeru: SSS/135/MOP-2025, ho nia medida Sta.0+000-7+000 km, ba empreza Kimberlie Konstrusaun Unipessoal, Lda.
Jornalista: Vitorino Lopez da Costa
Editór: Xisto Freitas da Piedade
