VIKEKE, 23 Setembru 2025 (TATOLI)—Diretór Ensinu Sekundáriu Tékniku Vokasionál (ESTV) Ravina, Postu Administrativu Lakluta, Munisípiu Vikeke, Rosito Soares Morais hateten ESTV Ravina Lakluta simu ona matrix ezame nasionál husi Ministériu Edukasaun (ME).
“Ami simu matrix husi ME, nune’e agora daudaun ne’e ami fó hela matrix ba ita-nia estudante sira tanba matrix ne’e aban-bainrua sei sai iha ezame nasionál. Tanba ne’e, iha ami-nia eskola disiplina haat kompostu husi língua portugeza, ingleza, biolojia ho matemátika,” Rosito Soares Morais ba TATOLI iha Postu Lakluta, Tersa ne’e.
Rosito dehan prosesu preparasaun ba distribuisun matrix ba estudante sira hotu, profesór sira sei pré-teste ba estudante, nune’e bainhira tama bá ezame nasionál estudante sira labele haluha.
“Nune’e mós ami fó hanoin ba estudante sira liga ba dokumentu sira-ne’ebé prepara ba ezame nasionál hanesan foto medida 3×4. Ami mós prepara hela dadus husi nasionál kona-ba naran no númera ezame nasionál. Ba tinan ida-ne’e, ami-nia estudante ne’ebé partisipa iha ezame nasionál hamutuk na’in-16 kompostu husi feto na’in-neen (6) no mne na’in-sanulu (10),” nia hato’o.
Notísia relevante: ESTV Ravina Lakluta menus profesór
Tuir nia katak estudante finalista husi ESTV Ravina daudaun ne’e partisipa iha prosesu preparasaun ba ezame nasionál no simu matrix.
Tuir dadus husi Servisu Edukasaun Munisípiu Vikeke, ba estudante finalista nivel Munisípiu Vikeke ne’ebé atu partisipa ezame nasionál totál hamutuk 3.121 kompostu husi Ensinu Báziku na’in-1.713, Ensinu Sekundáriu Jerál Siénsia Téknolojia na’in-743, Siénsia Sosiál Umanidade na’in-545 no Kristál Vikeke na’in-120.
Jornalista: Vitorino Lopez da Costa
Editór: Xisto Freitas da Piedade
