Governu konklui manutensaun estrada Ounokai-Babulu ne’ebé kotu

VIKEKE, 23 Setembru  2025 (TATOLI)—Governu liuhusi Ministériu Obra Públika (MOP) konklui normalizasaun estrada Ounokai, Aldeia Liaside, Suku Babulu, Postu Administrativu Uatulari, Munisípiu Vikeke ne’ebé kotu iha fulan-Marsu liubá.

“Ba obra manutensaun ne’e ami hahú servisu iha 23 Agustu  2025 no obra ne’e ami konklui servisu horisehik (22/09). Ne’ebé, daudaun ne’e transporte no ema bele asesu ona ho di’ak,” Enjiñeiru Empreza Bere Is Back, André Tavares hateten ba TATOLI iha Postu Uatulari, Tersa ne’e.

Nia dehan maski empreza konklui obra manutensaun, maibé parte MOP no Ajénsia Dezenvolvimentu Nasionál, Institutu Públiku (AND, I.P.) sei mai halo  inspesaun molok entrega ba Governu.

“Normalizasaun ida-ne’e sei la difikulta tan ba ita-nia transporte públiku no komunidade, tanba ami halo ona manutensaun ho di’ak. Estrada ne’e sei fasilita komunidade husi Suku Babulu, Matahoi, Afalokai, Makadike inklui Suku Uaitame ne’ebé asesu ba knua,” nia haktuir.

Nia akresenta estrada Ounokai ne’e kotu totál iha fulan-Marsu liubá, depoiz populasaun sira hato’o preokupasaun ne’e ba MOP Vikeke, nune’e tékniku  MOP Vikeke haree hodi halo levantamentu dadus, haruka pedidu ba nasionál hodi buka solusaun ba problema referidu.

Tuir André, estrada ne’e kotu difikulta movimentu públiku inklui empreza ne’ebé halo  serbisu iha Nunumalau-Iralere inklui populasaun sira-nia movimentu bá foho.

Nia tenik, iha manutensaun estrada ne’e, inklui mós gabiaun (bronjong) no konstrui drenajen metru hamutuk 50, husi parte loos metru  25 no parte karuk metru 25 no exton-box beton.

Enkuantu, orsamentu ba manutensaun estrada Ounokai totál hamutuk $63.774,41, durasaun serbisu fulan neen, maibé empreza konsege servisu ho durasaun fulan ida.

Jornalista: Natalino Belo 

Editór: Xisto Freitas da Piedade