Komunidade ezije Governu instala enerjia elétrika iha Raifun-Foho
BOBONARU, 23 Setembru 2025 (TATOLI)-Komunidade sira iha aldeia Raifun-Foho, suku Raifun, postu administrativu Maliana, munisípiu Bobonaru, husu ba Governu atu halo instalasaun enerjia elétrika, tanba tinan 20-resin aldeia ne’e seidauk asesu naroman eletrisidade.
Komunidade sira hato’o ezijensía ne’e tanba to’o agora sei kontinua sunu lamparia, kamii no painél solár.
“Ami presiza eletrisidade tama iha ne’e, tanba udan ona ami iha ne’e susar. Atu chas telefone de’it mós la di’ak, presiza ruma ami uza de’it jeneradór. Kuandu ami uza tenaga surya ne’e kalan tuku 10 taka ona, tanba aliran laiha. Entaun, ami-nia oan sira mós estuda la di’ak”, komunidade Raifun-Foho, Mateus Siga Mau, informa ba Tatoli, ohin.
Siga Mau haktuir katak problema ne’e líder komunitáriu sira hato’o beibeik ona no iha tinan rua ba kotuk Eletrisidade Timor-Leste (EDTL) mós halo ona levantamentu dadus iha terrenu, maibé to’o agora laiha rezultadu.
Iha sorin seluk, rezidente Verónica Pereira, triste haree aldeia viziña balu hetan ona naroman eletrisidade iha tempu kalan.
“Ami ho aldeia Nunutanan ne’e hanesan hela iha uma ida de’it, kuartu mak ketak-ketak, tanba saida mak sira-nia ahi tama ami seidauk. Ita ukun-an tinan 20-resin, agora ami mós ferik ho katuas ona, ami la goza, kala la hetan naroman to’o mate de’it ona”, nia lamenta.
Komunidade Juleta Pires reforsa katak sira ne’ebé iha kapsidade ekonómika bele sosa painél solár, maibé hirak ne’ebé ekonomia fraka obrigatóriu sunu kamii no balu toba iha nakukun laran.
“Ami-nia AQ Batria ne’e kuandu ben laiha ona, ami so’e ona, tenke bá sosa fali foun. Se ami la sosa, pasiénsia tuur iha nakukun, tanba ami ferik ho katuas hotu ona, osan laiha, sorte be ami simu osan idozu nia ne’e mak sosa tenaga surya ne’e, se laiha ami sunu deit lampu”, nia relata.
Antes ne’e, Xefe Unidade EDTL munisípiu Bobonaru, Mário de Jesus, konfirma katak proposta submete ona ba EDTL nasionál no tama ona iha sistema, hein de’it prosesu konkursu ba Projetu Eletrifikasaun Nasionál, tanba distánsia aldeia Raifun-Foho dook husi liña jerál.
Tuir dadus Monografia, suku Raifun, aldeia Raifun-Foho iha uma-kain 64 ho nia totál populasaun 200-resin.
Notisia relevante: EDTL orienta instala liña eletrisidade ba aldeia sira iha Bobonaro
Jornalista: Sergio da Cruz
Editora: Maria Auxiliadora
