Kona-ba Pensaun Vitalísia, PM Xanana : “ita bele hamoos totál, ha’u laiha problema”
DILI, 23 Setembru 2025 (TATOLI)—Primeiru-Ministru (PM), Kay Rala Xanana Gusmao, apoia atu halakon Pensaun Mensál Vitalísia.
“Bele, ita bele hamoos totál, ha’u laiha problema. Povu la husu mai ha’u atu simu ona, mai atu kurize hahalok a’at ne’ebé estraga hotu povu nia osan Estadu nia ne’e,” PM Xanana hateten ba Jornalista sira hafoin enkontru ho Komandante Jerál Polísia Nasionál Timor-Leste (PNTL) ho nia ofisiál superiór iha kuartel Jenerál Kaikoli, Tersa ne’e.
Xefe Governu dehan, atu halakon Pensaun Vitalísia ne’e Parlamentu nia kompeténsia maibé Governu afirmu apoia atu halakon Pensaun Vitalísia.
“Buat ida lei ne’e ba Parlamentu. Ha’u la’ós membru Parlamentu. Tanba saida mak ha’u la apoia. Loron hirak liubá Prezidente Repúblika organiza seminár Nova Jerasaun ha’u ba ko’alia iha ne’ebá, ita-boot laiha ne’ebá ida, ha’u temi povu la’ós hili ha’u mai fali iha ne’e atu simu osan, povu hili mai atu kurize hahalok ladi’ak ne’ebé uluk soe hela mai,” nia akresenta.
Notísia relevante : Komisaun A hahú audiénsia ba projetu Lei Seguransa Sosiál-Revogasaun Pensaun Vitalísia
Antes ne’e, iha loron 19 Setembru 2025, Bankada Congresso Nacional de Reconstrução Timorense (CNRT), Partidu Demokrátiku (PD) no Kmanek Haburas Unidade Nasionál Timoroan (KHUNTO) aprezenta ona ba meza Parlamentu Nasionál projetu lei revogasaun Pensaun Mensál Vitalísia ba Deputadu no Eis Titulár Órgaun Soberania no Providénsia sira seluk.
Projetu lei ne’e revoga Lei númeru 1/2007, 18 Janeiru, no Lei númeru 7/2007, 25 Jullu, relasiona ho pensaun no regalia ba deputadu no titulár órgaun soberania.
Iha sorin seluk, Parlamentu Nasionál aprova ona pedidu urjénsia ba debate kona-ba projetu Lei númeru 10/VI(3a) Rejime Jurídiku Seguransa Sosiál ba Titulár Órgaun Soberania ho unanimidade, votu a favór 59, kontra no abstensaun 0. Projetu ne’e aprezenta husi bankada opozisaun Frente Revolucionário de Timor-Leste Independente (FRETILIN) no Partidu Libertasaun Populár (PLP).
Jornalista : Natalino Costa
Editora : Julia Chatarina
