DILI, 23 Setembru 2025 (TATOLI) – Prezidente Repúblika José Ramos-Horta segunda kalan iha Palásiu Prezidensiál Prezidente Nicolau Lobato Bairru-Pite Dili inagura Mini-Jardín Zoolójiku atu promove konservasaun no kompaixaun.
Mini-Jardín ne’e lokaliza iha resintu Palásiu Prezidensiál, nu’udar mós pasu signifikativu ida hodi promove edukasaun ambientál no konservasaun ba animál fuik sira.
“Inisiativa ida-ne’e estabelese sentru ida ba edukasaun, rekreasaun, no konservasaun, oferese ba públiku liuliu labarik sira oportunidade úniku ida atu konekta ho animál lokál no doméstiku sira,” Ramos-Horta hateten iha nia diskursu.
Mini-Jardín Zoolójiku ne’e dezeña atu fornese esperiénsia prátika sira ne’ebé promove empatia, kuidadu, no respeitu ba natureza hahú husi idade ki’ik.
“Liuhusi Mini Zoolójiku ida-ne’e, ita konekta ita-nia oan sira ba natureza, fornese edukasaun no haburas respeitu ba ita-nia moris animál nian,” Ramos-Horta dehan.
Xefe Estadu ne’e dehan tan: “Ida-ne’e hanesan promesa ida ba futuru, promesa ida katak ita sei hapara kapturasaun ba ita-nia manu fuik sira no envezde ne’e aprende atu hadomi sira, hodi garante katak jerasaun tuirmai sei sai guardia ba Timor-Leste ne’ebé riku no diversu liután.”
Prezidente subliña, nesesidade krítiku ba kompaixaun no respeitu ba animál sira, hodi husu ba públiku atu hadook-an husi oho ka kaptura arbiru animál fuik sira, Prezidente Ramos-Horta mós fó mensajen inspirasaun ida ba labarik sira, hodi haree ba oin no kuidadu ambientál.
“Palásiu ida-ne’e, jardín, zoolójiku, pertense ba imi. Futuru pertense ba imi, no ida husi imi bele sai Prezidente iha loron ida,” Horta tenik.
Abertura ba Mini Zoo marka kapítulu foun ida iha nasaun nia kompromisu ba kuidadu ambientál no konservasaun ba nia animál fuik sira.
Jornalista: Hortencio Sanchez
Editór: Rafael Ximenes de A. Belo
