DILI, 23 Setembru 2025 (TATOLI)—Primeiru-Ministru (PM), Kay Rala Xanana Gusmão husu ba Polísia Sientífika Investigasaun Kriminál (PCIC, sigla portugés) atu kontrola jogu ilísitu no online scam.
“Buat ida-ne’e iha Oekusi antes de ha’u sai husi ne’ebá, ami hasai no kaer tiha ema sira ne’e no ami duni tiha ona, ne’ebé mosu agora ne’e oinsá fali,” PM Xanana hateten ba Jornalista sira hafoin enkontru ho Komandante Jerál Polísia Jerál Timor-Leste (PNTL) ho nia ofisiál superiór iha Kuartel Jenerál Kaikoli, Tersa ne’e.
Notísia relevante : PCIC kompromete serbisu hamutuk INTERPOL buka tuir jogu ilísitu no online scam
Xefe Governu dehan, PCIC tenke hamutuk ho PNTL serbisu kontrola siberkrime. “PCIC mak toma konta ida-ne’e. Ha’u hanoin imi tenki hatene husu buat sira hanesan ne’e sá instituisaun ida-ne’ebé mak haree buat sira ne’e mak PCIC ne’e la’ós Polísia.”
Hodi hatutan : “Ha’u dehan ona, antes de ha’u sai, ami hola ona solusaun no ema sira ami kaer tiha ona, maibé derrepente mosu. Ida-ne’e PCIC mak hatene.”
Antes ne’e, iha 26 Agostu 2025, PCIC hamutuk ho Servisu Nasionál Intelejénsia (SNI) hala’o vizita supreza ida hodi halo buska apreensaun no desmentela ba jogu online ilegál rua hanesan esplorasaun jogu ilísitu online, burla informátika, rede scam call center transnasionál, ne’ebé instala husi empreza internasionál Seagull Resort husi nasaun Malázia iha otél Oé-Upun Rejiaun Administrativa Espesiál Oekusi Ambenu (RAEOA).
Jornalista : Natalino Costa
Editora : Julia Chatarina
