DILI, 23 Setembru 2025 (TATOLI)—Selesaun Nasionál Futsál Timor-Leste kontinua derrota ho Uzbekistaun ho skor 1-7 iha jogu kontinuasaun faze kualifikasaun Grupu F Asian Football Confederation (AFC-sigla ingleza) Futsál Asian Cup 2026, iha Segunda (22/09) kalan.
Ekipa Nasionál Uzbekistaun lidera ho golu 0-3 iha primeira parte ne’ebé enxe husi jogadór Mashrab Adilov iha minutu tolu (3), Khusniddin Nishonov iha minutu haat (4) hafoin simu pasajen bola husi Adilov liuhosi bola kantu, no antes minutu rua primeira parte ramata, jogadór Eldor Nigmatov enxe tan golu hodi muda tabele skor sai 0-3.
Uzbekistaun kontinua domina iha jogu segunda parte, iha-ne’ebé rezulta tan golu haat ne’ebé enxe husi jogadór hanesan Shakhzodjon Sadiev iha minutu 24 no Muzaffar Akhadjonov iha minutu 35. Akhadjonov kontinua aumenta golu maski ekipa Timor-Leste enxe golu hodi muda tabela skor 1-6 no jogadór Elbek Tulkinov produs golu ikus hodi rezulta Uzbekistaun manán ho skor 1-7.
Notísia relevante: Kompetisaun AFC Futsál, Ekipa TL derrota ho Kirzikistaun
Ho jogu referidu rezulta ekipa Lafaek kontinua iha zona mean ho pontu 0 husi totál jogu rua no derrota daruak, enkuantu Uzbekistaun iha pozisaun datoluk ho pontu tolu, rezultadu husi jogu rua kompostu manán ida (1) no derrota ida (1).
Enkuantu, Kirzikistaun kontinua lidera tabela klasifikasaun ho pontu 6 hafoin manán Palestina ho skor 2-1 no Palestina iha pozisaun daruak rezultadu husi jogu rua kompostu manán ida (1) no derrota ida (1).
Tuir oráriu, Timor-Leste sei hala’o jogu ikus kontra Palestina no Kirzikistaun kontra Uzbekistaun iha loron-24 Setembru.
Jornalista: Natalino Belo
Editór: Xisto Freitas da Piedade
