Agostinho Mesquita re-eleitu ba Prezidente Konsellu Kombatente Munisípiu Dili

DILI, 24 Setembru 2025 (TATOLI)—Konferénsia Munisipál Konsellu Kombatente Libertasaun Nasionál, durante loron rua, 23-24 Setembru, eleje hikas Agostinho Mesquita Martins ba Prezidente Konsellu Kombatente Munisípiu Dili períodu 2026-2030.

Iha Konferénsia Nasionál estabelese pakote haat. Pakote A ho votu hamutuk 107, pakote B ho votu 52, pakote C eskluidu, pakote D ho votu 96. Totál votu nulu 34, votu branku 5 husi totál votante 294 no delegadu auzente ema na’in sanulu-resin tolu (13) husi totál delegadu 207.

Pakote A

Agostinho Mesquita Martins “Israel” (Prezidente),
Januário Oliveira Maureha (Sekretáriu),
Faustino Breok (membru),
Anabela Bikura (membru),
Miguel Marques (membru);

Pakote C eskluidu tanba la prenxe kritériu tan laiha delegadu.

Pakote B

Reis Kadalak (Prezidente),
Aquilis Soares da Costa (Sekretáriu),
Celestino da Silva Namkari (membru),
Armindo de Sá Manukey (membru),
Armindo Mendonça (membru)

Pakote D

Luís Soares Moniz Cainhoto (Prezidente),
Januario Oliveira Maureha (Sekretáriu),
Luisa Alves Sarmento “Megawati” (membru),
José Filomeno Tatoras (membru),
Luís C. Moniz da Silva (membru),

Prezidente Eleitu Konsellu Kombatente Libertasaun Munisípiu Dili, Agostinho Mesquita Martins agradese ba konfiansa hosi veteranu sira hodi lidera tan dala ida iha mandatu tinan 2026-20230.

Prezidente Eleitu Konsellu Kombatente Munisípiu Dili períodu 2026-2030, Agostinho Mesquita Martins. Imajen TATOLI/Osória Marques

“Ami kontinua servisu tuir orden ne’ebé iha. Nune’e, ami-nia responsabilidade ida mak ba dadus pendente sira, reklamasaun no kontestasaun ba veteranu rejistadu 2009,” Martins hateten ba jornalista sira iha salaun Maubai, Komoro, Kuarta ne’e.

Nia dehan ida-ne’e ba mandatu daruak nian, maibé kompleta ba mandatu lima nian hosi Prezidente sesante (matebian).

“Ha’u uluk iha 2019 eleitu nu’udár membru Postu Administrativu Vera-Krús, durante tinan tolu nia laran. Depoiz Prezidente sesante, Salustiano Belo “Uro” fila tiha (mate), ami na’in tolu eleitu liuhusi kaixa. Ha’u mak eleitu ba Prezidente husi loron 12 Jullu 2023 to’o horisehik. Ohin re-eleitu ba Prezidente Munisípiu Dili hodi kompleta ba tinan lima (5) nian.

Entretantu, dadus veteranu ne’ebé tama lista reklamasaun no kontestasaun hamutuk 2.300-resin. Tuir planu, sei halo verifikasaun iha fulan-Outubru hamutuk 2.300-resin.

Jornalista: Osória Marques

Editór: Xisto Freitas da Piedade